Sahl ibn Saʼd as-Soidiy (roziyallohu anhu)dan rivoyat qilinadi: Bir ayol Rasululloh ﷺning huzurlariga bir burda olib keldi — «Burda nima?» deyilsa, «Shamla», dedi. Ayol: «Ey Allohning Rasuli, buni sizga kiydirish uchun oʻz qoʻlim bilan toʻqidim», dedi. Rasululloh ﷺ unga ehtiyojlari boʻlgani uchun uni oldilar va uni izor qilib bizning oldimizga chiqdilar. Shunda falon ibn falon degan bir kishi — u kuni uni nomi bilan atagan edi — keldi-da: «Ey Allohning Rasuli, bu burda naqadar chiroyli! Uni menga kiydiring», dedi. U zot: «Xoʻp», dedilar. Ichkariga kirganlarida uni buklab, unga yubordilar. Shunda odamlar u kishiga: «Vallohi, yaxshi qilmading. Nabiy ﷺ unga ehtiyojlari boʻlgan holda uni kiygan edilar, sen esa u zotdan uni soʻrading. Holbuki, u zot soʻraganni qaytarmasliklarini bilar eding», dedilar. U kishi: «Vallohi, men undan uni kiyish uchun soʻramadim, balki mening kafanim boʻlishi uchun soʻradim», dedi. Sahl aytdi: U vafot etgan kuni haqiqatan uning kafani boʻldi.Саҳл ибн Саъд ас-Соидий (розияллоҳу анҳу)дан ривоят қилинади: Бир аёл Расулуллоҳ ﷺнинг ҳузурларига бир бурда олиб келди — «Бурда нима?» дейилса, «Шамла», деди. Аёл: «Эй Аллоҳнинг Расули, буни сизга кийдириш учун ўз қўлим билан тўқидим», деди. Расулуллоҳ ﷺ унга эҳтиёжлари бўлгани учун уни олдилар ва уни изор қилиб бизнинг олдимизга чиқдилар. Шунда фалон ибн фалон деган бир киши — у куни уни номи билан атаган эди — келди-да: «Эй Аллоҳнинг Расули, бу бурда нақадар чиройли! Уни менга кийдиринг», деди. У зот: «Хўп», дедилар. Ичкарига кирганларида уни буклаб, унга юбордилар. Шунда одамлар у кишига: «Валлоҳи, яхши қилмадинг. Набий ﷺ унга эҳтиёжлари бўлган ҳолда уни кийган эдилар, сен эса у зотдан уни сўрадинг. Ҳолбуки, у зот сўраганни қайтармасликларини билар эдинг», дедилар. У киши: «Валлоҳи, мен ундан уни кийиш учун сўрамадим, балки менинг кафаним бўлиши учун сўрадим», деди. Саҳл айтди: У вафот этган куни ҳақиқатан унинг кафани бўлди.