Allohga doimo ibodat qilish, Uning ibodatidan shaytoniy kibr ila bosh tortmaslik farishtalar amali. Farishtalar doimo Allohga tasbeh aytadilar, Unga sajda qiladilar. Inson ham ushbu ishlarni oʻziga lozim tutsa, farishtalardan ham yuksak maqomga erishadi.

Ushbu oyati karima Qurʼondagi birinchi sajda oyati hisoblanadi. Maʼlumki, oʻn toʻrt surada sajda oyatlari kelgan. Donish ahli bu oyatlarni yaxshi biladilar. Har bir Qurʼon kitobida bu oyati karimalarga alohida belgilar qoʻyilgan. Ushbu sajda oyatlarini oʻqigan yoxud eshitgan shaxslarga tilovat sajdasi vojib boʻladi. Shuningdek, imom namozda tilovat qilsa ham, sajda lozim boʻladi. Agar bir sajda oyati bir oʻrinda bir necha marta tilovat qilinsa, tilovat sajdasi bir karra joizdir. Ammo, bir necha oʻrinda tilovat qilinsa, uning soniga muvofiq sajda qilinadi. Tilovat sajdasida: «Allohu akbar» deb bir marta sajda qilinadi. Soʻng, duosi oʻqiladi. Mazkur sajda oyatlarida Allohni ulugʻlash, Unga sajda qilish maʼnolari boʻlganidan, ularni oʻqigan yoki eshitgan musulmonlarga sajda qilish vojib boʻlgandir.