Mashhur mufassirlardan Abu Hayyon rahmatullohi alayhi yuqoridagi oyatlar toʻgʻrisida quyidagilarni yozganlar: «Alloh taolo ushbu narsalar ila ularni sharaflash uchun va ularda zohir boʻladigan ajoyibotlar Allohning qudratidan ekanligiga va ularni yaratish Oʻzi tarafidan ekanligiga ishora qilish uchun qasam ichdi.

Jahannam mislsiz ulkan azob ekanligini tasdiqlash, taʼkidlash uchun qasam ichdi.

Ushbu oyatlarda quyosh bilan oy Alloh taoloning maxluqlari ekaniga, ikkovlari oʻz harakatlari, kelishlari, ketishlari, ular tufayli kechasi va kunduzi boʻlishi bilan Alloh taoloning amriga boʻysunishlariga ishora bor. Ikkovlari Allohga sajda qilurlar. Bas, shundoq ekan, nega odamlar quyosh bilan oyga ibodat qilishadi? Ularning Xoliqi Alloh taologa ibodat qilishmaydi?!