Foydalar 106-dars | Xech narsa befoyda bo'lmaydi

Ibnu Hazm Andalusiy aytdilar: “Hech narsa befoyda bo‘lmaydi! Darhaqiqat, johillar bilan bahslashib, shundan ham buyuk foyda oldim. Bu foyda shuki, johillar o‘zlarining bo‘lmag‘ur gaplari bilan mening tabiatimga alanga yoqishadi, aqlu xayolimga o‘t qo‘yib fikrimni qizitishadi! Natijada bu gaplardan g‘ayratim qo‘zib, buyuk va foydali kitoblar yozishimga sabab bo‘lishadi. Agar shu johillar meni qo‘zg‘atib, ichimni yondirib turmaganlarida edi, bu kitoblar yozishga ham qo‘zg‘almagan bo‘lardim.” (Mudāvatun-Nufus kitobidan) Imom Ibn Hazmning bu so‘zlari naqadar to‘g‘ri! Aynan shuning uchun ham barcha zamonlarda haq ahlining ro‘parasida aqli kalta, dovdir odamlar chiqib turadi. Alloh taolo aytganidek: “Barcha payg‘ambarlarga dushmanlar qildik.” (An’om, 112) Demak, bu johillarning asl vazifasi — “olovga kerosin bo‘lib berish.” Natijada ular haq ahliga “reaktiv kuch” hosil qilishda yordam beradi! Buning ortidan haq ahli reaktiv raketa singari samoga ko‘tariladi! Ammo johillar va ig‘vogarlar esa: “Dami chiqib, tutun bo‘lib, izsiz qolib ketaveradi.”