Foydalar 109-dars | Selfi tushishga qullik!

21-asr balolaridan biri, ko‘plarni chalg‘itgan ofatlardan biri ham shu: ibodatmi, tijoratmi, to‘y-tantana yoki motammi — hamma narsada: «Avval bir selfi tushaylik!» — “Birodarlar, men hajdaman!” — “Birodarlar, mana men qurbonlik so‘ymoqdaman!” — “Birodarlar, mana men samolyotdaman!” … va hokazo. Shu odamlarga aytgim keladiki: “Birodarlar, ‘mana men hojatxonadaman’ deb ham qo‘yib qo‘ying facebook profilingizga!” Kimdir aytishi mumkin: «Xo‘p, nimasi yomon?» Yomon tarafi mana: Alloh taolo aytadi: “Odamlardan ba’zilari, behuda (lag‘v) gaplarni sotib olib, o‘zi bilmagan holda Allohning yo‘lidan adashtiradi.” (Luqmon, 6). Bugun facebook yoki boshqa ijtimoiy tarmoqlarda tarqatilayotgan foydali ma’lumotlar, shar’iy ilmlarni o‘qishdan odamlarni chalg‘itib, fitnaga solayotgan narsalardan biri ham shu — selfilar. Hamma bittadan selfi qo‘ysa ham, u boshqalarining vaqtini o‘g‘irlashga yetadi. Shuning uchun, odamlarning vaqti va himmatini shaxsiy hayotingiz bilan mashg‘ul qilmang!