Foydalar 135-dars | Islomiy kadrlarni muhofaza qilish

Bugungi kunda kofirlarning Islomga qarshi olib borayotgan ayovsiz kurash nuqtalaridan biri shuki: “Boshliqlarni yo‘qotish va har sohada layoqatli kadrlarni beshigidayoq ko‘mib tashlash!” Ammo bu siyosat haqida dinimiz bizni allaqachon ogohlantirib qo‘ygan! Alloh taolo aytadi: «Muhammad (alayhissalom) bir Rasul xolos. Ul zotdan oldin ham rasullar o‘tgan. Agar u zot vafot etsa yoki qatl qilinsa, sizlar ortga qaytib ketasizlarmi?!» (Oli Imron: 144) Shayx Sa’diy rahimahulloh bu oyatni sharhlab aytadilar: «Ushbu oyatda Alloh mo‘minlarni malomat qilmoqda. Qanchalik buyuk bo‘lmasin, boshliqni yo‘qotish ularni dovdiratmasligi lozim. Balki ular doim bu ehtimolga tayyor turishlari kerak. Bu esa barcha diniy va dunyoviy sohalarda kadrlarni oldindan tayyorlab qo‘yish bilangina amalga oshadi. Qachon bir bosh yo‘qolsa, o‘rniga boshqasi davom etadi» (Qovaidul-Xisan kitobidan). Demak, bu bizga shunchaki reja emas, balki shar’iy buyruqdir. Unga tayyor bo‘lmaganlarni Allohning o‘zi malomat qilmoqda! Endi bugun bizning holatimizga qarasak: — Na biror sohada tuzuk boshlig‘imiz bor; — Na borini muhofaza qila bilamiz; — Na yangi kadr tayyorlashga astoydil harakat qilamiz! Balki oddiy bir tilimizni ham tiyolmay, “og‘iz qurtlatib” g‘iybatxona qilib, borini ham sir-sinoati bilan tekinga dushmanga tutqazib beramiz. Yana bir achchiq haqiqat shuki: bizga eng muhim “kadr” aslida nafsimizdir! Shu nafsni tinch yuritish uchun ba’zilar barcha kadrlarni qurbon qilishga tayyor turadi. So‘ngra xotirjam qilib: «Bunisi ketsa, Alloh boshqasini chiqarib qo‘yaveradi» — deb qo‘yadi.