Foydalar 162-dars | Ba’zi ishlarni sir tutish

«Ba’zi ishlarni aka-ukangiz, hatto farzandingizdan ham sir tutishingiz lozim!» Allohga tavakkal qilish — kishi barcha sir-asrorini fosh qilib yurishi degani emas! Buning tasdig‘ini Yusuf alayhissalom qissasidan topamiz: Yusuf alayhissalom yoshligida ko‘rgan tushlarini otasiga aytganda, otalari dedilar: «Ey o‘g‘ilcham! Bu tushingni akalaringga aytmagin» (Yusuf, 5). Ya’ni, ehtiyotkorlik talab qilinardi. Shunga qaramay, Ya‘qub alayhissalom Yusufni juda ko‘p himoya qilganlari uchun o‘zlarining nozik tomonlarini ham fosh qilib qo‘yib dedilar: «Men (Yusufni) bo‘ri yeb ketishidan qo‘rqaman» Shunda akalari otalarining aynan nimadan xavotirda ekanini bilib olishdi va keyin: «Ota, uni bo‘ri yeb ketdi» — deb kelishdi! Ibrat shuki: o‘zingizning nozik tomoningizni oshkor qilib, dushmanlaringiz aynan o‘sha joyingizga zarba berishlariga sabab bo‘lib qolmang! Ammo Ya‘qub alayhissalom singari, avval qo‘lingizdan kelganicha sirni saqlang, himoya qiling. So‘ngra baribir qo‘rqib yurgan narsangiz sodir bo‘lsa — endi bu Allohning qadari, deb taslim bo‘ling!