Foydalar 170-dars | Talab qo‘yishdan oldin qalbga kiring

Alloh taolo mo‘min bandalari haqida aytadi: «(Alloh) ularni yaxshi ko‘radi, va ular ham Uni yaxshi ko‘radilar» (Moida, 54). Oyatga e’tibor bering: Alloh avvalo bandalarini yaxshi ko‘rishini zikr qildi, so‘ngra bandalari ham Uni yaxshi ko‘rishini aytdi! Sodda qilib aytganda: «Muhabbat taqdim qilmasdan turib, uni talab qilmang!» Ba’zilar atrofidagi kishilarga qarab: «Yaxshi ko‘rsang-ko‘rmasang, menga nima!» deydi. Lekin qarangki, Allohga bizdan nima foyda bor? U zot birinchi bo‘lib bandalarini yaxshi ko‘rishini eslatib, keyin bizdan muhabbat talab qilmoqda! Shuning uchun «yaxshi ko‘rsang yaxshi ko‘raman, birodar bo‘lsang birodar bo‘laman» deyish — bu xudbinlik alomatidir! So‘ngra shu yaxshi ko‘rgan kishingizdan biror xatolik sodir bo‘lsa, unga qanday tanbeh berish kerak? Buni ham Alloh taolo o‘rgatadi. Rasuli alayhissalomga tanbeh berib shunday dedi: «Alloh sizni kechirsin! Nega ularga (jangdan qolishga) izn berdingiz?» (Tavba, 43). Ya’ni: «Nega bunday qilding?» deb gap boshlashdan oldin, «Alloh sizni kechirsin» deb ko‘ngilga yo‘l ochdi! Aslida, Alloh hech kimni rioya qilishga majbur emas!