Yuklanmoqda…
Yuklanmoqda…
Kishi xalqqa haqiqiy foydasi tegadigan olim yoki tolibi ilm bo‘lib yetishmog‘i uchun evazsiz xizmat qilishni o‘rganishi zarur. Sodda qilib aytganda: «Odamlar qadrlash-qadrlamasligiga qarab, harakatdan bo‘shashmang!» Buning dalili Qur’oni karimdagi quyidagi oyatda keladi. Hizr alayhissalom ilm olmoq uchun kelgan Muso alayhissalomga ayni shu masalani ta’lim berdilar: «U ikkisi yo‘lga chiqdilar. Qachonki, bir qishloq ahliga kelgach, ulardan taom so‘radilar, ular esa (Muso va Hizrni) mehmon qilishni istamadilar» (Kahf: 77) Oyatga diqqat qiling! Ikki buyuk payg‘ambarni mehmon qilishni istamadilar. Qadringiz bo‘lsa, shularcha bo‘lar! Endi qissaning davomini qarang: «Shunda u yerda yiqilay deb turgan devorni topib (Hizr) uni tiklab qo‘ydi. Shunda (Muso) aytdi: “Istasangiz, bunga haq olsangiz bo‘lardi”» (Kahf: 77) Hizrning qadrini bilishmagan bo‘lsa ham, bu hol u kishining himmatiga, odamlarga foyda keltirishiga ta’sir qilmadi. Devorni baribir tikladi! Ammo Muso alayhissalom odamlardan g‘azablanib: «Bular bizni qadrlamagan bo‘lsa, nega bekorga devorini tiklashimiz kerak?» – degan ma’noda fikr bildirganlarida, natijani qarang: (Hizr) aytdi: «Mana bu – men bilan sening ayrilishimiz bo‘ldi!» (Kahf: 78) Bugun ham odamlar ma’qullasin yoki eshigini berkitsin, tolibi ilm va olimlar xalq ichidagi «yiqilay deb turgan devorlarni» tiklashda bo‘shashmasliklari kerak! Kimda-kim odamlardan haq olish evaziga mehnat qilsa, yoki uning mehnatini qadrlashlariga qarab kayfiyati o‘zgaradigan bo‘lsa, yoki ularning avzoyiga qarab dinni moslab bersa, unga aytamiz: «Mana bu – biz bilan sizning yo‘lingiz ayrilishi bo‘ldi!»