Foydalar 172-dars | Alloh masxarachilarga o'zi kifoya qiladi

Kishi Alloh yo‘lida biror ish boshlar ekan, albatta, odamlar tomonidan nazarga ilmaslik, masxaralash va kamsitilish holatlariga duchor bo‘ladi. Alloh taolo aytadi: «Batahqiq, sizdan oldingi rasullarga ham istehzo qilindi. Bas, ularni masxara qilib yurganlar o‘zlariga istehzolari bilan qaytdilar.» (Anbiyo: 41) Shuningdek, Nuh alayhissalom haqida shunday deyiladi: «U kema yasardi. Har qachon qavmidagi kattalar uning oldidan o‘tsa, uni masxaralashardi. U esa der edi: “Agar bugun bizning ustimizdan kulsangiz, albatta, biz ham ertaga sizning ustingizdan kulamiz”» (Hud: 38) Maqsad shuki, ular bilan ovora bo‘lib, kema yasashdan chalg‘imang! Chunki: «Albatta, Robbingiz kuzatuvda!» (Fajr: 14) Undan ko‘ra, Allohning buyruqiga amal qiling: «O‘zingizga buyurilgan narsalarni ochiq ayting! Va mushriklardan yuz o‘giring!» (Hijr: 94) Agar baralla haqni aytsangiz va kofir-mushriklardan yuz o‘girib baroat qilsangiz, mukofot nima? «Albatta, Biz sizga masxara qiluvchilarni kifoya qilib qo‘yganmiz.» (Hijr: 95)