Foydalar 174-dars | Elektron qalam sohiblari

Elektron qalam sohiblari diqqatiga! Ba’zan havaskor mediachi birodarlar shijoat bilan darslarni tarqatishni boshlashadi. Lekin ozroq muddat o‘tgach, kuzatuvchilarning e’tiborsizligiga, botil ahlining esa tomoshabinlari ko‘pligiga qarab, himmatlari susayib qoladi. Siz bir narsani yoddan chiqarmang: Siz din ahkomlarini tarqatib, internetga emas, balki Nomai a’molingizga joylamoqdasiz! Qiyomatda bu amallar millionlab insonlar oldida namoyish qilinadi. Dunyoda esa botil ahlining kuzatuvchilari millionga yetsa ham, ta’sir doirasiga e’tibor bering! Ular go‘yo bir ko‘pik ko‘tarig‘idek bo‘lib, birinchi musibat kelishi bilanoq tarqab ketadi. Imom Ahmadni tanimagan mo‘min bo‘lmasa kerak. Lekin u zot hayotlik chog‘larida quvg‘inda, qochib yurgan, deyarli hech kim tanimaydigan inson edilar. Ammo u kishining zamonida hammaning og‘zida nomi yuradigan bir «Saroy imomi» bor edi. Uning hattoki nomi ham tarixda qolmadi. Vaqtinchalik shuhratga aldanmang! Niyatingizni xolis qiling. So‘ngra mana bu oyatlarni eslang: «(Qur’onda) kitobda Ibrohimni eslang! Ismoilni eslang! Maryamni eslang!» Va bundan tashqari o‘nlab shaxsiyatlarni Alloh taolo Qur’onda zikr qildi. Ular ixloslari sabab Alloh ularning amallarini abadiy eslatishni buyurdi. Alloh aytadi: «Ayting: Amal qilinglar! Albatta, Alloh amallaringizni ko‘radi» (Tavba: 105) Shaytonga uchmang! Ehtimol, bugun siz qo‘ygan bir manbadan foyda olgan yosh go‘dak, ertaga buyuk insonga aylanib, butun dunyoni boshqarar. Shunda siz «faqat bir odam ko‘rdi» deb o‘ylagan narsangizni aslida butun olam ko‘rgan bo‘ladi.