Foydalar 181-dars | Nafsingiz qaysi ma'dandan

Rasululloh alayhissalom aytdilar: «Insonlar ma’dan konlari singaridir. Ularning johiliyatda yaxshisi, Islomda ham yaxshidir, agar (dinni) anglab tushunsalar!» (Buxoriy–Muslim) Tabiatda tilla, kumush, ko‘mir va boshqa ma’danlar konlari bo‘lganidek, insonlar ham shunday: kimlardir tilla, kim esa ko‘mir! Ba’zan tilla insonlar tilla koni singari yer qa’rida ko‘milgancha, axlatlar ostida yotgan bo‘ladi. Ularni topib, tozalash kerak! Mana Fir’avn sehrgarlarini qarang: umr mobaynida tog‘utga xizmat qilib yurgan, ammo haqiqiy «zargar», ya’ni Muso alayhissalomga yo‘liqqanlarida, u zot ularni bir lahzada tozalab, asl haqiqatlarini fosh qildilar. Natijada ular shahid bo‘lib, tilla odamlar safida boqiy qoldi! Shuningdek, umr mobaynida fohishalik qilib yurgan bir ayol, bir tashna it oldidan o‘tayotib, aslida tilla tabiati jo‘shib, unga suv berdi va Alloh uni kechirib yubordi! Ammo aslida nafsingiz ko‘mir konidan, ichi qora bo‘lsa, endi it nari tursin, Allohning uyi Ka’bada turib hojilarni sug‘orsangiz ham befoyda! (Xuddi Makka mushriklari singari!) Bu nafsning tilla yoki ko‘mirligi yuqoridagi misollarda aytilganidek, lahzalar ichida aniqlanib qoladi! Ba’zan umr bo‘yi tilla bo‘lib yurasiz, ammo nafsingizda bir maraz ko‘mirni tozalamaganingiz sabab, Alloh bir lahzani jo‘natib kimligingizni fosh qilib qo‘yadi. Shuning uchun hadisda: «Agar dinni anglab tushunsalar» deyildi! Ya’ni din — bu, aslida, nafisingiz nima moddadan ekanini tushunib, uni tozalash! Vaqtinchalik ibodatga aldanib, «Men taqvodorman» demaslik, balki hal qiluvchi lahzaga ogoh bo‘lib tayyor turish demakdir!