Foydalar 184-dars | Sizni yomonlikka giriftor qilgan narsa asli nafsingiz

Kishi hayotda yomon oshna, yomon xotin, yoki ayollar yomon er va farzandlarga girifdor bo‘lib, hamma bir-birini qarg‘ab yuradi. Lekin ko‘plar unutgan bir nuqta bor: «Asli yomonlik manbasi qayerda?» Buning javobini ikki qissadan ko‘ramiz: Alloh taolo aytadi: «Musoni, Fir’avn ahli o‘ziga dushman va qayg‘u bo‘lishi uchun (daryodan) tutib oldi! Albatta, Fir’avn, Homan va ularning lashkarlari xatokor edi.» (Qasos: 8) Asli gunohlari va xatolari sabab, ularga yo‘liqqan payg‘ambar ham ularga balo bo‘ldi. Ammo Fir’avn xotini aytdi: «Uni o‘ldirmanglar, shoyad bizga foydasi tegsa yoki uni farzand qilib olsak.» (Qasos: 9). Nafsi pok bo‘lgani sabab unga Muso ne’mat bo‘ldi! Shuningdek, Yusuf alayhissalom qissasida ham, uni Misrda sotib olgan kishi xotiniga aytdi: «Shoyad bizga foydasi tegsa yoki uni farzand qilib olsak.» (Yusuf: 21) Bir xil so‘zlar! Ammo vazir nafsi pokligi sabab Yusuf unga foyda bo‘ldi, xotini esa nafsi buzuqligi sabab Yusuf unga fitna va balo bo‘ldi! Atrofingizda payg‘ambarlar jam bo‘lsa ham, nafsi tuzatmas ekansiz, ular sizga balo-ofat va mahzunlikni ziyoda qiladi xolos! Shuning uchun aybni er xotinidan, xotin eridan, do‘st birodaridan izlab yurmasin. Bu hikmatni tushunmas ekansiz, umr doimiy odamlardan shikoyat qilib dod-voylash bilan o‘tadi!