Foydalar 192-dars | Joy tanlash tug'mas tovuqning bahonasi

Rasululloh ﷺ dedilar: «Men uxlab yotganimda, Islomning ustuni (Xilofat) yostig‘im tagidan olinib ketildi. Qarab tursam, Shomga o‘rnatilgan ekan!» Shuningdek, u zot tug‘ilganlarida onalari ko‘rgan tushni zikr qilib aytadilar: «Onam meni tuqqanida, o‘zidan bir nur chiqqanini ko‘rdi. Bu nurdan Shom qasrlari yorishdi!» Avalgi foydada aytilganidek, Shom ahli «biz payg‘ambarlar zurriyotimiz» deb g‘ururlanib ketgach, bu xislat ulardan olinib, Makkaga ko‘chirildi. Ammo Makka ahli ham (bugun ko‘rib turganimizdek) «biz payg‘ambar va sahobalar avlodimiz» deb g‘ururga berilib, amalni tark qilgach, endi ulardan ham Islom ustuni olinib, Shomga — to‘dalangan «vatangadolar»ga tortiq qilinadigan bo‘ldi! Rasululloh ﷺ tug‘ilishlaridayoq Shom qasrlarini yoritgan nur bilan bu haqiqatga ishora qilingan edi. Ya’ni, u zotning mulki boshqa payg‘ambarlarning qarorgohi bo‘lgan Shomga qaytadi. Lekin bu din otangizdan qolgan meros emas, balki amal qilganlarniki ekanini ko‘rsatish uchun Islom ustuni Shomdan Makkaga, Makkadan yana Shomga ko‘chirildi. Isro voqeasining ham Makkadan Shomga bo‘lgani aynan shu ma’noga tasdiqdir. Ibnu Taymiyya rahimahulloh aytadilar: «Fazilat — iymon va solih amaldadir. Qaysi makon solih amal qilishga qulay bo‘lsa, o‘sha yer kishi uchun afzal bo‘ladi. Ehtimol, boshqa bir kishiga boshqa yer afzal bo‘lishi mumkin. Gohida afzal joyda bo‘lsa-da, uni odamning o‘zi fazilatdan mahrum qiladigan xolatlar sodir bo‘ladi. Masalan, kimdir Makkada yashamoqchi bo‘ladi, ammo odamlarga tilamchilik qilib, sadaqaga ko‘z tikib yashaydi. (Bunday odam uchun Makkada yashashning qadri qolmaydi!) Yoki kimdir Shomda yashaydi, ammo maqsadi faqat mol-mulkni yoki nafsini saqlash bo‘ladi, solih amal uchun emas. (Bunday odamga Shomning fazilati nasib etmaydi!)» «Joy tanlash — tug‘mas tovuqning bahonasidir!»