Yuklanmoqda…
Yuklanmoqda…
Nega Rasululloh alayhissalom munofiqlarni o'ldirmas va odamlarga chiqib ularni tanitib qo'ymas edilar? Buning ostida yuqoridagi siyosat yotadi: «Shaxslarni emas, shaxsiyatlarni o’ldiring.» Ularni shaxsini o'ldirsangiz: «Ko’rolmadi, hasad qildi, aybi aytayotgan edi, shunga chiday olmadi» — degan, bugun hayotda hammamiz eshitib turgan gaplar sodir bo'lar edi. Shuning uchun ularning shaxsiga emas, shaxsiyatiga hujum qilinib: «Ularning alomati, ulardan shundaylari borki» degan uslubda tinimsiz oyat-hadislar bilan chuqur zarba berilaverdi! Qarabsizki, ular xalq ichida tirik murdaga aylanadi! Bugungi islomni iddao qilgan botil ahli bilan muomala ham shunday bo'ladi. Lekin ba‘zilarda savol tug'iladi: «Ularning gaplarini eshitib, qancha odam adashib ketmoqda. Qanday bunga qarab turamiz?!» To'g'ri! Ammo Uhud jangida ham Abdulloh ibn Ubayyning gapiga kirib, musulmonlar safidan uchdan bir qism lashkar qaytib ketdi — qaytib ketadigan odamlar kimligi ham bizga ko'rinishi kerak emasmi?! Agar «najosat» bo'lmasa, pashsha bilan asalari qanday ajratar edik?! Najosatga qo'nuvchi pashshalar haqida Alloh taolo aytadi: «Ularni qo'zg'alishini Alloh xohlamadi! Ularni o'troq qilib qo'ydi, o'tiruvchilarga qo'shilib o'tiraveringlar deyildi. (Chunki) ular garchi sizlarga chiqishsa, sizlarga zarardan boshqa narsa ziyoda qilmas edilar. Oralaringizga fitna istab ig'vo solar edilar, holbuki sizlar ichlaringizda tinimsiz ularga quloq soluvchilar bor.» (Tavba:47). E'tibor bering, haqiqiy pashshalarning chiqishini Alloh mutloq xohlamadi, chunki bizning ichimizda aslida asalari bo'lib, lekin pashshalar bilan hamtovoq bo'lganlari bor! Ular ham pashshaga aylanib ketmasin deb Alloh rahm qildi... Ana bu insonlarga qayg'u qilsangiz bo'ladi — xolos! Shuning uchun bizga pashshalar kerak. Ularni tek qo'ying, lekin ularning najosatini shunday fosh qilingki, qayerga qo'nishsa, oyoq kiyim bilan quviladigan bo'lishsin.