Foydalar 200-dars | Kitoblarga nazar solish

Abdulloh ibn Mas’ud raziyallohu anhu aytadilar: «Qur’onga doimiy nazar solinglar» (Ibnu Abi Shayba rivoyati). Abdulloh ibn Abbos raziyallohu anhumo aytadilar: «Ahli sunnatdan bo‘lgan, sunnatga chaqirib, bid’atdan qaytaradigan bir kishining yuziga nazar solish ham ibodatdir…» (Imom Lalikaiy rivoyati). Ular dunyodan o‘tgach esa, ularning kitoblariga nazar solish — ularning yuziga nazar solishdek chuqur ma’no beradi. Chunki haromga qarash gunoh bo‘lganidek, halolga qarash ham ibodat bo‘ladi. Bu asosni Rasululloh alayhissalom aytadilar: «Aytinglar: — Agar avratini haromga qo‘ysa, gunohmidi?» Sahobalar: — «Ha», deyishdi. Rasululloh alayhissalom aytdilar: — «Unda halol ham shunday (savob bo‘ladi)» (Imom Muslim rivoyati). Shuning uchun tolibi ilm o‘qishdan horib-charchaganda, kitoblarga nazar solib xordiq chiqarishidan ham ko‘p foydalar va ilhomlar kelib chiqadi. Mana 200 dan oshiq “Kun foydasi” loyihasining fikri qayerdan keldi? Kitob javonini titkilab, tomosha qilib o‘tirganimda, Imom Ibnu Qoyyumning «Foydalar» va «Badoi’ul-Favoid» kitoblariga ko‘zim tushdi. U zot bu kitobni qatra-qatra yig‘ilgan suv kabi jamlaganliklarini o‘qidim va «Kun foydasi» loyihasini Alloh ilhom qildi. Qarabsizki, shundoq ham o‘tib ketayotgan kunlarimizga bir donadan «foyda» qo‘shilib, bugun 200 ga yetibdi. Bu esa, Allohning tavfiqidan so‘ng, kitoblarga nazar solishning ulkan foydasi! Gohida uy jihozlarini titkilab, bir vaqtlar yo‘qotib qo‘ygan buyumingizni topib olib xursand bo‘lasiz. Aql va kitob ham shunday: titaversangiz, yo‘qotganingizni topasiz.