Yuklanmoqda…
Yuklanmoqda…
Ramazondagi aqidalardan yana biri: "Ramazon mo‘min uchun dunyo, iftor esa misoli o‘limdir." Alloh taolo jannatda mo‘minlarga aytadi: "O‘tgan kunlaringiz (dunyoda taqdim qilgan) narsalaringiz sabab, yenglar, ichinglar, osh bo‘lsin!" (Al-Haqqo: 24) Tobe’in Mujohid rohimahulloh aytadilar: "Ya’ni, dunyoda ro‘za tutganingiz sabab." Banda Ramazonda kun bo‘yi taomi, ichimligi va shahvatidan tiyilib, iftor vaqtida bularning barchasi unga halol bo‘lgani kabi, dunyoda ham harom yeguliklar, sharoblar va harom shahvatlardan tiyiladi. Qachonki unga o‘lim kelsa, ana endi uning iftori — ya’ni nihoyat vaqti keladi, endi unga hech narsa harom bo‘lmaydi! Alloh taolo aytadi: "U jannatda nafslar ishtaha qiladigan va ko‘zlar lazzatlanadigan barcha narsalar bordir. Va sizlar unda abadiy qolursizlar!" (Zuxruf: 71) Hadisda aytilgan: "Ro‘zadorga ikki xursandchilik bor: biri iftor vaqtida, ikkinchisi Robbisiga yo‘liqqanida." Bu ham aslida shunga ishora qilib, "iftor va o‘lim" birga zikr qilindi! Ibnu Rajab rohimahulloh aytadilar: "Ey tavba qiluvchilar jamoasi! Bugun (dunyoda) havoi nafs shahvatlaridan ro‘za tutinglar (ya’ni tiyilinglar). Allohga yo‘liqqanda fitr hayitini qilasizlar! Ajalni sekin sanab, vaqt sizga uzoq tuyulmasin! Chunki ro‘za kunining (ya’ni dunyoning) aksar qismi o‘tdi, Allohga yo‘liqish hayiti (o‘lim) yaqin qoldi." (Latoiful-Ma’orif) Alloh taolo aytadi: "Kim Allohga yo‘liqishdan umidvor bo‘lsa, albatta, Allohning (belgilagan) ajali keluvchidir." (Ankabut: 5) Demak, butun hayotni ro‘za deb tasavvur qiling va unda qaytarilgan ishlardan tiyiling, iftor kuni hammasiga erishasiz! Shuning uchun dunyoda "tilla-ipak" kiyib, "iftor" qilib olganlar oxiratda kiymaydi. Dunyoda aroq ichib, "iftor" qilib olganlar oxiratda ichmaydi. Dunyoda oliftalik qilib "tilla-kumush" idishlarda ovqatlanganlar, oxiratda ulardan mahrum bo‘ladi. Bularning barchasi dunyoda "iftor" qilib bo‘lganlardir. Alloh taolo aytadi: "Sizlar pokiza narsalaringizni dunyo hayotida ketkazib, ulardan foydalanib bo‘ldinglar." (Ahqof: 20) Dunyoda soqol qo‘yib, odamlar haqoratiga sabr qilganlar, Allohga yo‘liqqanda "iftor" qilib, soqolsiz bo‘lib jannatga kiradilar. Dunyoda Alloh yo‘lida har qanday qiyinchiliklarga yo‘liqqanda, iftorga oz qolganini unutmang. Iftordan so‘ng ajrni egallab, oyoqni cho‘zib yotish lazzatini eslang — musibatingiz lazzatga aylanadi!