Yuklanmoqda…
Yuklanmoqda…
Ro‘za aqidalaridan yana biri: "Nusratni sekin sanab, natijaga shoshmaslik." Rasululloh alayhissalom nikohga targ‘ib qilgach, unga qodir bo‘lmagan kishilarga tavsiya qilib aytdilar: "Kim (uylanishga) qodir bo‘lmasa, o‘ziga ro‘zani lozim tutsin. Albatta ro‘za (shahvatni) 'bichishdir'!" (Buxoriy – Muslim) Ma’lumki, kishi bir necha kun ro‘za tutishi bilan uning shahvati so‘nib qolmaydi. Aslida, ro‘zaning avvalida badan harorati ko‘tarilib, kishida yanada shahvat qo‘zg‘algandek his-tuyg‘u paydo bo‘ladi. Lekin bu o‘tkinchi holatdir. Ro‘zani bardavom qilish bilan badanda harorat pasayib, kishining shahvati bosila boshlaydi. Demak, bu yerda yuqoridagi aqida kelib chiqadi: "Shariat buyruqlarida natijaga shoshilmang." Bu aqida shariatning har bir buyrug‘ida inobatga olinishi lozim. Aks holda kishida shariatga nisbatan shak-shubha, umidsizlik paydo bo‘lib, hatto munofiqlikka borib yetishi ham mumkin. Alloh taolo munofiqlar haqida aytadi: "Ular (nusrat kelmaydi deb) Allohga yomon gumon qiluvchilardir." (Al-Fath: 6) Ya’ni, Alloh mo‘minlarga nusrat va’da qilganiga ishonib janglar boshlanganida, aksar janglar avvalida musulmonlar mag‘lub bo‘lgandek ko‘rinardi. Shunda bu o‘tkinchi holat ekanini tushunmagan shoshqaloq munofiqlar: "Sizlarga aytgan edik..." deb gap boshlardilar. "Ro‘za shahvatni qirqadi" deganda, bu bugun yoki ertaga ko‘rinadigan natija bo‘lmaganidek, nusrat ham shundaydir! Rasululloh alayhissalom aytdilar: "Bilginki, nusrat sabr bilandir." (Termiziy) Xobbab ibn Arot raziyallohu anhu Rasululloh alayhissalomga kofirlarning zulmidan shikoyat qilib: "Bizga nusrat talab qilmaysizmi?! Bizning haqqimizga duo qilmaysizmi?!" deganida, u zot bu aqidani eslatib aytdilar: "Albatta Alloh bu dinni tamom qiladi. Lekin sizlar shoshqaloqlik qilasizlar." (Imom Buxoriy) Ro‘zador qanchalik qiynalmasin, quyosh botguniga qadar vaqt o‘tmaguncha uning dod-voy qilishi quyoshni tezlatmaganidek, qiyinchiliklarga sabr qilmasdan "Nusrat kechikmoqda" deb dod-voy qilish ham nusratni tezlatmaydi. Bugun bir oylik ro‘zaga sabr qila olmay g‘amga tushib ketayotgan ummat, nusratdan oldingi "uzoq ro‘za"ga qanday sabr qiladi? "Nusrat ro‘zasi" qancha davom etadi, bilasizmi? Alloh taolo aytadi: "Yoki sizlar (osongina) jannatga kiramiz deb o‘yladinglarmi? Hali avvalgilarga kelgan narsalardek sinovlar sizlarga ham keladi! Ularga balo va musibatlar yetib, ularni larzaga solardi. Hattoki, Rasul va u bilan iymon keltirganlar: 'Allohning nusrat qachon?!' der edilar." (Baqara: 214) Mana shu "nusrat ro‘zasi"dan o‘tsangiz, endi natijani kuting: "Ogoh bo‘linglar, albatta Allohning nusrat nihoyatda yaqin!" (Baqara: 214)