Yuklanmoqda…
Yuklanmoqda…
Ramazon aqidalaridan yana biri: "Ramazonda saxovatni o‘rganish." Boshqacha aytganda: "Yerdagilarga rahm qilinglar, samodagi Zot sizlarga ham rahm qiladi." Baqara surasining ro‘za haqidagi 182–187-oyatlari asnosida, 186-oyatda Alloh taolo bandalariga yaqinligini zikr qilib, o‘ziga duo qilishni amr qilgan. Ro‘za asnosida duoga amr qilinishi ostida, uning rahmati bu oyda yog‘ilishi va duo eshiklari ochilishiga ishora bor. Allohning rahmatiga erishish uchun esa bandalarga rahm qilishni o‘rganish lozim. Bu ma’no quyidagi hadisdan kelib chiqadi: Ibnu Abbos raziyallohu anhumo aytadilar: "Rasululloh sollallohu alayhi va sallam eng saxovatli kishi edilar. Saxovatlarining eng cho‘qqisi Ramazonda, Jabroil alayhissalomga yo‘liqqanlarida bo‘lar edi. Ramazonda har kecha Jabroil Rasulullohga yo‘liqib, u zot bilan Qur’onni dars qilar edi. Shunda Rasululloh alayhissalom esib turgan shamoldan-da saxovatli bo‘lar edilar." (Muttafaqun alayh) Ramazonda saxiyliklarining oshib ketish sababi shundaki, saxiy farishta Jabroil eng Saxovatli Zot huzuridan, saxovatga buyurgan Kitobni olib tushar edi. Bu holat shuni ko‘rsatadiki, kishi o‘z atrofidagilar xulqi bilan ham ta’sirlanadi. Ramazonda saxovatli kishilar bilan hamroh bo‘lib, bu xislatni aslida yanada o‘rganish lozim. Banda Ramazonda o‘zi och bo‘lib sadaqa qilish orqali Alloh taolo maqtagan "iysor" — ya’ni o‘zidan ko‘ra boshqaga ravo ko‘rish sifatini o‘rganadi. Alloh taolo mo‘min bandalari haqida aytadi: "Ular taomni o‘zlari yaxshi ko‘rib tursalarda, uni miskin, yetim va asirlarga yediradilar." (Inson: 8) Agar ro‘zangizga sadaqa ibodatini qo‘shsangiz, mukofotini quyidagi hadisdan biling: "Jannatda bir qasrlar bor. Ularning tashqarisi ichidan, ichkarisi tashqaridan ko‘rinib turadi." "Ular kim uchun, ey Rasululloh?" deyishdi. "Ular kalomini shirin qilgan, taom yedirgan, ro‘zani doimi tutgan va odamlar uxlaganda namoz o‘qiganlar uchun," dedilar. Ramazon esa mana shu xislatlarning barchasini o‘rgatadigan oydir! Mo‘min Ramazonda birov bilan urushmaydi, ro‘zani doimiy tutadi, odamlar uxlaganda taroveh va tahajjud namozlarini qoim qiladi. Bu ishlarga odamlarni taom yedirish, ya’ni sadaqa xislatini qo‘shib, jannatdan qasrlar bino qiling!