Foydalar 33-dars | Qasosdan keyin ham tinchimaydiganlar

“Zulm ko‘rdim” deb, Alloh belgilagan jazodan oshirib jazolaydigan, yoki haqqini olib ish yopilgandan so‘ng ham tinchimay, o‘zini “mazlumman” deb ko‘rsatadigan odamlar Allohning mana bu so‘zini yodda tutsin: Alloh qasos olishga yoki qasos o‘rniga tovon puli to‘lashga ijozat berib, so‘ngra aytadi: “Kim shundan keyin ham (tinchimay) haddidan oshsa, endi alamli azob unga bo‘ladi.” (Baqara, 178). Ya’ni, haqini olgandan so‘ng yana haligi qotilni ko‘rib qolib, «Sen qotilsan», deb unga ozor berib, eski muammoni qayta kavlasa yoki «Alloh uchun sabr qilaman, bo‘ldi, seni kechirdim», deb aytgan bo‘lsa-da, keyin yana shu muammoni ko‘tarsa, endi Alloh uning tarafdori emas. Balki, Alloh birinchi zulm qilgan va jazosini olgan odamning tarafdori bo‘ladi. O‘zini «mazlumman» deb haddidan oshgan kimsaga esa Alloh alamli azobni va’da qilmoqda. Chunki Alloh uchun qilingan amaldan orqaga qaytish hadisda: “Qusganini qaytib yeydigan itga o‘xshatilgan.” (Imom Buxoriy rivoyati)