Yuklanmoqda...
Yuklanmoqda...
Agar Ramazonning oxirgi o‘n kunligida ayol kishininz hayzi kelsa, ushbu fazilatli kunlarda ibodatni ado etish imkoniyatiga ega bo‘lish uchun hayzni toʻxtatuvchi dorilarni ishlatishi joizmi?
Bu savol Shayx Muhammad ibn Usaymin rahimahullohga taqdim etilganda, u kishi shunday javob berdilar: «Bizningcha, u Allohga toat qilishga yordam berishi uchun bu dorilarni ishlatmasligi lozim. Chunki chiqadigan hayz Alloh Odam qizlariga bitib qo‘ygan narsadir.
Nabiy sollallohu alayhi va sallam Hajjatul Vado’da oʻzi bilan haj qilishga otlangan Oisha roziyallohu anhoning oldiga kirdilar, u umraga ehrom bog‘lagan edi, Makkaga yetib bormasdan hayz ko‘rdi. U zot zavjasining oldiga kirganlarida u yig‘layotgan edi. U zot: «Nimaga yig‘layapsan?» dedilar. U hayz ko‘rganini aytdi. Shunda u zot: «Bu Alloh Odam qizlariga bitib qo‘ygan narsadir», dedilar. Shunday ekan, hayz ayolning ixtiyorida emas. Agar oxirgi o‘n kunlikda hayzi kelsa, Alloh unga taqdir qilgan narsaga qanoat qilsin, ammo bu dorilarni ishlatmasin. Menga ishonchli tabiblardan yetib kelgan xabarga ko‘ra, bu dorilar bachadon va qonga zararlidir. Shuningdek, agar homilador bo‘lsa, homilaga nuqson yetishiga sabab bo‘lishi ham mumkin. Shuning uchun biz bunday dorilarni iste’mol qilishdan saqlanishni maslahat beramiz. Zero, hayz kelib, namoz va ro‘zani tark etishi uning qo‘lida emas, balki Allohning taqdiri bilandir.
Alloh bilguvchiroqdir.
Manba: Shayx Muhammad ibn Usaymin rahimahulloh.