Yuklanmoqda...
Yuklanmoqda...
Bizda namoz o‘qib bo‘lgach, joynamozni yig‘ishtirib qo‘yish odat tusiga kirgan. Aytishlaricha, agar joynamoz yig‘ishtirib olinmasa, jinlar kelib, uning ustida namoz o‘qir yoki uyga jinlar kirib olar emish! Bu gap menga juda g‘alati tuyuldi, axir ular chindan ham bunda ibodat qilishsa, bu katta baxt-ku, shunday emasmi? Shar'iy manbalarda bu gapning biror asosi bormi yoki bu bid’at tushunchami?
Bu e’tiqod oddiy xalq orasida tarqalgan xurofotlardan biri bo‘lib, uning Allohning dinida hech qanday asosi va shariat manbalarida birorta dalili yo‘q. Bu shunchaki bir to‘qima gap, omi xalqning uydirmalari va ixtirolaridandir.
Modomiki shunday ekan, musulmon kishiga bu so‘zlarni aytish ham, ularga ishonish, e’tiqod qilish ham joiz emas. Chunki jinlar olami g‘aybiy olam bo‘lib, biz u haqda faqat Qur’oni Karim va sahih Nabaviy sunnat manbalarida kelgan ma’lumotlarnigina bilamiz. Shar'iy manbalarda jinlar haqida zikr qilinmagan narsani tasdiqlash ham, unga e’tiqod qilish ham joiz emas.
Endi, faraz qilaylik, jinlar uyga kirib, yig‘ishtirilmagan joynamozda namoz o‘qishadi ham, deylik. Bunday holatda uni yig‘ishtirgandan ko‘ra yoyiq holda qoldirgan afzalroq bo‘lardi. Zero, u solih musulmon jin bo‘lib, uning uyda — shu joynamozda yoki boshqa joyda namoz o‘qishi ham o‘zi uchun, ham uy ahli uchun xayr va barakadir.
Rasululloh sollallohu alayhi vasallam uyga kirayotganda uy egasi Alloh taoloning ismini zikr qilmasa, bu uyga shayton kirishini bayon qilganlar. Bu haqda 77208-raqamli fatvoda batafsil soʻz yuritilgan.
Ehtimol, ba’zi ota-onalar yosh bolalarini tozalikka rioya qilish, uyni saranjom-sarishta tutish va shunga o‘xshash maqsadlarda namozdan so‘ng joynamozni yig‘ishtirishga odatlantirish uchun savolda zikr qilingan gaplarni aytishgandir.
Biroq bu nafaqat yolg‘on, balki boshqa bir yomon oqibatga ham olib keladi: bola shu botil e’tiqod bilan ulg‘ayadi va bu xurofot uning uchun aqidaning bir qismiga aylanib qoladi, Alloh asrasin.
Alloh bilguvchiroqdir.