Paygʻambarimiz sollallohu alayhi vasallam mushriklarga azob kelishi, qiyomat boʻlishi haqida xabar bergan edilar. Bu xususda baʼzi oyatlar ham nozil boʻlgan. Albatta, bu xabarlar kishilarni ogohlantirish, ularni kufr va shirkning yomon oqibatidan qoʻrqitish uchun yuborilgan. Kofirlarga azob qachon kelishini ham yoki qiyomat qachon boʻlib, unda kofirlar jazosini qachon olishini ham hech kim bilmaydi. Bu ishlar Alloh taqdir qilib qoʻygan vaqtda boʻladi. Mushriklar shu gapni ushlab oldilar. Ular doimo Paygʻambarimiz sollallohu alayhi vasallamga: «Sen aytgan qiyomat, azob qachon keladi, kelsa, tezroq kela qolmaydimi?» deb shoshirishar edi. Ular oʻzlaricha: «Agar Muhammad aytganidek, Alloh kofirlarni azoblaydigan boʻlsa, mana, biz kofir boʻlib turibmiz, nima uchun bizni azoblamayapti? Agar mushriklarni azoblaydigan boʻlsa, mana, biz mushrik boʻlib turibmiz, nima uchun bizni azoblamayapti? Agar osiylarni azoblaydigan boʻlsa, mana, biz osiy boʻlib turibmiz, nima uchun bizni azoblamayapti?» deyishardi. Bu dagʻdagʻalari bilan ular: biz toʻgʻri qilyapmiz, Muhammad odamlarni quruq gaplar bilan qoʻrqitib yuribdi, unga ishonmaslik kerak, demoqchi boʻlishardi. Ular Alloh taolo har bir ishni hikmat bilan qilishini tushunib yetishmasdi. Oʻzlariga beriladigan azobning ketga surilishida hikmat borligini bilishmasdi. Har bir ish Alloh tomonidan oʻlchab qoʻyilganini, belgilangan muddatida boʻlishini anglashmasdi. Shuning uchun ham, bu oyat:

«Allohning amri keldi», deb boshlanmoqda. Allohning «Kofir va mushriklarni azobga duchor qilaman» degan vaʼdasi chiqdimi, boʻldi, shuning oʻzi yetarli. Bu, oʻsha azob keldi, degan gap. Alloh aytgan ish boʻlmay qolmaydi.

«Bas, uning tezroq kelishini talab qilmay qoʻya qoling.»

U boʻldi hisob. Tezroq kelishini talab qilishning xojati yoʻq. U erta ham, kech ham kelmaydi. Balki, faqat Alloh belgilagan vaqtda aniq keladi.

«U zot ular keltirayotgan shirklardan pok va oliy boʻldi.»

Alloh taolo mushriklar qilayotgan eʼtiqoddan pokdir. Uning haqidagi nomaʼqul fikrlardan oliydir.