Ey Paygʻambar, senga Robbing nozil qilgan narsaga kofirlar ishonmaydilar. Undagi xabarlarga, jumladan, oʻlgandan keyin qayta tirilishga ham iymon keltirmaydilar. Aksincha, bu xabarni istehzo bilan qarshi oladilar. Odamlar ichida masxara qilib turli gaplar tarqatadilar.

«Kufr keltirganlar esa: «Sizlarga butunlay titilib bitgan chogʻingizda albatta yangitdan yaratilishingiz xabarini berayotgan kishini koʻrsataylikmi?!» deydilar.

Yaʼni, ey Paygʻambar, kofirlar seni masxara qilib, ey odamlar, sizlar oʻlib, qabrga koʻmilganingizdan keyin, tanangiz butunlay titilib bitgandan keyin yana yangitdan yaratilar emishsizlar. Ana, anavi kishi shunaqa deyapti-ku, deydilar.

Oʻlib, chirib, tuproqqa qorishib ketgan odamning qayta tirilishiga ular ishonmaydilar. Bu haqdagi gap Allohning nomidan gapirilsa, Allohga nisbatan yolgʻon toʻqish yoki jinnilik deb oʻylaydilar. Shuning uchun ham, ular sening haqingda, ey Paygʻambar:

«U, Allohga nisbatan yolgʻon toʻqidimi yoki jinni boʻlib qoldimi?» – dedilar».

Odamlar oʻlib, tanasi chirib ketgan boʻlsa ham, barchasi qiyomatda qayta tiriladi, deb Alloh nomidan xabar berganing uchun shu gapni aytdilar.

«Yoʻq!»

Kofirlarning bu gaplari notoʻgʻri! Sen Allohga nisbatan yolgʻon toʻqiganing ham yoʻq! Jinni boʻlganing ham yoʻq!

«Oxiratga iymon keltirmaydiganlar azobda va yiroq zalolatdadirlar.»

Ularning, oʻlgandan soʻng qayta tirilish yoʻq, degan adashuvlariga qarshi oʻlaroq, albatta, qayta tirilish boʻladi. Qayta tirilish kunida ular qattiq azobda qoladilar.

Ular nima uchun qayta tirilishni inkor etadilar?!