Qurʼoni Karim koʻplab yetuk sifatlarga musharraf kitobdir. U, bu dunyoga ham, oxiratga ham barakadir. «Biz tushirgan bu kitob muborakdir». Bu haqiqatni Qurʼoni Karimga aloqasi boʻlgan har bir musulmon yaxshi biladi. Agar dunyoda yashashdan maqsad ikki dunyoning barakasiga erishmoq boʻlsa: «Bas, unga ergashing». Undan oʻzga ergashishga arzigulik narsa yoʻq. Boshqalar barakasiz narsalar. Ularga ergashganlar ikki dunyoda maqsadlariga erisha olmaydilar. Qurʼonga ergashish bilan birga, taqvo ham boʻlishi zarur. «Va taqvo qilinglar». Chunki, taqvosiz Qurʼonga ergashishni tasavvur ham qilib boʻlmaydi. Agar inson taqvo ila Qurʼonga ergashsa: «Shoyadki, rahim qilinsangizlar».