Ushbu oyatlardagi «sirlar fosh boʻladigan kun»dan murod qiyomat kunidir. Darhaqiqat, qiyomat kuni bu dunyoda ochilmay qolgan barcha sirlar ham ochiladi. Bu dunyoda bir ishni qilib qoʻyib, men qilganim yoʻq deb, sir saqlab, oʻzini oqlab qutulib ketish mumkindir. Ammo, oxiratda hech narsani sir saqlab boʻlmaydi. Ana oʻshandoq kunda Qodir Alloh asli sulb va taroib orasidan chiqadigan arzimagan, jirkanch suvdan paydo boʻlib, keyin gʻururga ketib, hovliqqan insonni qayta tiriltirib, sirlarini fosh qilishga va jahannam oʻtida kuydirib, ishini rasvo qilishga qodirdir.