Yuklanmoqda…
Yuklanmoqda…
Misrga kelayotganimizda biz bilan hamroh bo‘lgan bir do‘stimizning ahli oilasi unga shunday degan edi: «Odamlar 10 yillab o‘qiydigan narsani sen 1–2 yilda o‘qib tugatgin-da, tezroq uyga qayt.» Ko‘plab tolibi ilmlarning oyog‘iga bolta uradigan narsa mana shu ota-onalarning qistovidir. Ha, odamlar 10 yilda oladigan ilmni 1–2 yilda olish mumkin, lekin aqida, iymon va tarbiyani bunday tezlikda egallab bo‘lmaydi! Shu bois Qur’onni bugun odamlar 1 yilda yodlab qo‘yishi mumkin, ammo sahobalarga bu ta’lim 23 yilda berilgan! Yoki Imom Buxoriyning mashhur asari Sahihul Buxoriy yozilishi uchun 16 yil, Imom Muslimning Sahihi Muslim kitobi uchun 15 yil, Sahihul Buxoriyga yozilgan eng mo‘tabar sharh — Fathul-Boriyni yozish uchun esa 25 yil vaqt ketgan! Endi shuncha olimlar yarim umrini bag‘ishlagan ilmni olish uchun siz farzandingizga atigi 1–2 yil fursat berib, “keyin qaytgin” deb qistash — naqadar xato! Ibnu Javziy rahimahulloh aytadilar: “Archa daraxti bilan oshqovoq bahslashib qolibdi. Oshqovoq dedi: Sen ham daraxtsan, men ham daraxtman. Senda ham barg bor, menda ham. Lekin sen bir meva berishing uchun 30 yil kutish kerak! Ammo men esa har ikki haftada meva beraman! Shunda archa aytdi: To‘g‘ri! Lekin kuz kelsin, ko‘ramiz” Ya’ni kuz kelganda oshqovoqdan asar ham qolmaydi, chirib yo‘q bo‘lib ketadi. Ammo archa esa qishi bilan yam-yashil turadi. Tolibi ilmlar ham shunday: 1–2 yil o‘qib tashlab ketganlar — oshqovoqqa o‘xshab, bir fitna kelganda chirib tamom bo‘ladi. Ammo archalar kabi sabr qilganlar, yillar davomida tarbiya va iymon bilan pishganlar, har qanday qaqshatqich sovuqlarga ham dosh beradilar! (Eslatma: arab tilida oshqovoqqa ham “daraxt” deyiladi.)