Usmon (roziyallohu anhu)dan rivoyat qilinadi: «Xamrdan saqlaninglar, chunki u yomonliklarning onasidir. Sizlardan avval oʻtganlar orasida bir ibodatgoʻy kishi bor edi. Uni bir buzuq ayol yaxshi koʻrib qoldi va oʻz choʻrisini uning oldiga yuborib: ‹Bizni guvohlik uchun chaqirayapmiz›, dedi. U choʻri bilan yoʻlga chiqdi. Choʻri qaysi eshikdan kirsa, ortidan uni yopa boshladi, toki u bir chiroyli ayolning oldiga yetdi. Ayolning yonida bir bola va bir idish xamr bor edi. Ayol: ‹Vallohi, men seni guvohlik uchun chaqirmadim, balki seni menga qoʻshilishing yoki mana bu xamrdan bir qadah ichishing yoxud mana bu bolani oʻldirishing uchun chaqirdim›, dedi. U: ‹Menga bu xamrdan bir qadah ichir›, dedi. Ayol unga bir qadah ichirdi. U: ‹Yana koʻpaytir›, dedi va oradan koʻp oʻtmay ayolga qoʻshildi hamda odam ham oʻldirdi. Bas, xamrdan saqlaninglar, chunki vallohi, iymon bilan xamrga mukkasidan berilish jamlanmaydi, albatta ulardan biri ikkinchisini quvib chiqaradi», dedi.Усмон (розияллоҳу анҳу)дан ривоят қилинади: «Хамрдан сақланинглар, чунки у ёмонликларнинг онасидир. Сизлардан аввал ўтганлар орасида бир ибодатгўй киши бор эди. Уни бир бузуқ аёл яхши кўриб қолди ва ўз чўрисини унинг олдига юбориб: ‹Бизни гувоҳлик учун чақираяпмиз›, деди. У чўри билан йўлга чиқди. Чўри қайси эшикдан кирса, ортидан уни ёпа бошлади, токи у бир чиройли аёлнинг олдига етди. Аёлнинг ёнида бир бола ва бир идиш хамр бор эди. Аёл: ‹Валлоҳи, мен сени гувоҳлик учун чақирмадим, балки сени менга қўшилишинг ёки мана бу хамрдан бир қадаҳ ичишинг ёхуд мана бу болани ўлдиришинг учун чақирдим›, деди. У: ‹Менга бу хамрдан бир қадаҳ ичир›, деди. Аёл унга бир қадаҳ ичирди. У: ‹Яна кўпайтир›, деди ва орадан кўп ўтмай аёлга қўшилди ҳамда одам ҳам ўлдирди. Бас, хамрдан сақланинглар, чунки валлоҳи, иймон билан хамрга муккасидан берилиш жамланмайди, албатта улардан бири иккинчисини қувиб чиқаради», деди.