۞ مَا نَنسَخْ مِنْ ءَايَةٍ أَوْ نُنسِهَا نَأْتِ بِخَيْرٍ مِّنْهَآ أَوْ مِثْلِهَآ ۗ أَلَمْ تَعْلَمْ أَنَّ ٱللَّهَ عَلَىٰ كُلِّ شَىْءٍ قَدِيرٌ
Muhammad Sodiq Muhammad Yusuf: Oyatlardan birontasini nasx qilsak yoki unuttirsak, undan yaxshisini yoki unga o`xshashini keltirurmiz. Alloh har narsaga qodir ekanini bilmadingmi?Оятлардан биронтасини насх қилсак ёки унуттирсак, ундан яхшисини ёки унга ўхшашини келтирурмиз. Аллоҳ ҳар нарсага қодир эканини билмадингми?Alauddin Mansour: (Ey Muhammad alayhis-salotu vas-salom), biron oyatni bekor qilsak yoki yodingizdan chiqarsak, undan yaxshirogʻini yoki oʻshaning mislini keltiramiz. Alloh har narsaga qodir zot ekanini bilmadingizmi?(Эй Муҳаммад алайҳис-салоту вас-салом), бирон оятни бекор қилсак ёки ёдингиздан чиқарсак, ундан яхшироғини ёки ўшанинг мислини келтирамиз. Аллоҳ ҳар нарсага қодир зот эканини билмадингизми?
«Nasx» soʻzi lugʻatda oʻzgartirish, bekor qilish maʼnosini bildiradi. Shariat taʼrifida esa, bir sharʼiy hukmning undan keyin kelgan sharʼiy dalil bilan bekor qilinishiga aytiladi. Tushunish uchun oddiy bir misol keltiradigan boʻlsak, koʻpchilik boʻlar-boʻlmasga Paygʻambar alayhissalom huzurlariga kirib, bekorchi gaplar bilan u zotning vaqtlarini olishaverganidan soʻng, Alloh taolo oyat tushirib, kim Paygʻambar alayhissalom bilan huzurlarida yolgʻiz qolib gaplashmoqchi boʻlsa, gaplashishdan oldin sadaqa qilishga buyurdi. Odamlar bu orqali Paygʻambar alayhissalomning qimmatli vaqtlarini bekor oʻtkazmaslik lozim ekanligini anglab boʻlganlaridan soʻng, boshqa oyat tushirib, avvalgi hukm bekor qilingani eʼlon etildi.
Ushbu oyati karimalarda Alloh taolo har bir narsaga qodir ekanligi taʼkidlangan. Ana shu qudrati ila xohlagan oyatni nasx qiladi, xohlaganini unutdiradi. Bu xohishni yahudiylar chegaralay olmaydilar. Shuningdek, osmonlaru yerning mulki Allohniki, jumladan, qaysi oyatni nasx etish, qay birini unut qilish ham U Zotning Oʻzining mulki, Oʻzi biladi.
Yuqoridagi oyatlarda xitob moʻminlarga qaratilgan boʻlib, unda ogohlantirish va eslatish bor edi. Yahudiylarning fitnachilik bilan tarqatgan gaplari baʼzi moʻmin-musulmonlarga taʼsir qilib, Paygʻambar alayhissalomga turli boʻlgan-boʻlmagan savollar berishga ham urinib qolganlarida, Alloh taolo quyidagi oyatni tushirdi: