Ushbu oyatda eslatilgan zotlardan Ismoil alayhissalom maʼlum va mashhurdirlar. U kishining qissalari boshqa suralarda batafsil kelgan. Bu oyatda u zotning sabr-toqatlariga alohida urgʻu berilmoqda. Haqiqatan ham, Ismoil alayhissalom yuqori darajada sabr namunalarini koʻrsatganlar. U kishi oʻsimlik oʻsmaydigan sahrolarda sabr qilib oʻsganlar. Baytullohni qurishda otalari Ibrohim alayhissalomga sabr va matonat bilan yordam berganlar. Oʻzlarini qurbonlik uchun soʻyish amri kelganida ham sabr qilganlar.

Idris alayhissalom haqida maʼlumotlar oz. «Maryam» surasida ham zikrlari oʻtdi. Unda qavmlarining kirdikorlariga sabr qilganlari haqida soʻz ketgan edi. Ushbu oyatda ham u kishining sabr sifatlari yod etilmoqda.

Zul-kifl alayhissalom haqida maʼlumotlar yana ham oz. Hatto baʼzilar u zotni Paygʻambarlar safiga qoʻshmaydilar ham. Lekin «Anbiyo» surasida mashhur Paygʻambarlar bilan birga zikr etilishlari u zotning Paygʻambarlardan boʻlganlarini koʻrsatadi. Shu bilan birga, ushbu oyatda u kishi ham sabr qilguvchilar qatoriga qoʻshilmoqdalar.