Arab tiliga xos boʻlgan xususiyatlar bois, tafsirchi ulamolarimiz oyati karimadagi «nasl-nasab»ga «oʻgʻil», «quda-anda»ga «qiz» deb maʼno berganlar. Chunki, bir urugʻ yoki oilaning nasabi saqlanishiga oʻgʻil bola sabab boʻlsa, boshqalar bilan quda boʻlishiga qiz bola sabab boʻlar ekan. Shunda:

«U, suvdan bashar yaratgan va uni nasl-nasab, quda-anda qilib qoʻygan Zotdir» jumlasining maʼnosi, Alloh nutfadan odam yaratgan va oʻsha odamni erkak va ayol qilib qoʻygan zotdir, degani boʻladi.

Aslida, ayol kishiga oʻtgan erkak suvidagi oʻn minglab urugʻlikdan bittasigina bachadondagi tuxumga ilashib, undan bola paydo boʻladi. Ana oʻsha koʻzga koʻrinmas kichik narsa Allohning irodasi ila murakkab insonga aylanganida oʻgʻil yoki qizga ajraladi. Milliardlab erkak-ayolning har birining oʻziga xos xususiyatlari, bir-biriga oʻxshamas tomonlari bor. Koʻzga koʻrinmas oʻsha urugʻlikka shu xususiyatlarni joylagan Allohning qudratiga qoyil qolmay boʻladimi?! Bunga Allohdan oʻzga kim qodir boʻladi? Hech kim.

«Robbing qodir boʻlgan Zotdir.»

Ey Paygʻambar, sening Robbing har bir narsani, shu jumladan, arzimagan suvdan murakkab insonni ham yaratishga qodir Zotdir.

Lekin oʻsha arzimagan suvdan Alloh qudrati ila yaralgan insonlarning koʻplari oʻzlarining xoliqlarini tanimaydilar.