Arab tilida qalin daraxtzor–daraxtlari bir-biriga kirishib ketgan oʻrmon «ayka» deyiladi. Bu oyatda zikri kelayotgan «qalin daraxtzor» Madyan oʻlkasidir. Bu oʻlka Hijoz bilan Falastin oʻrtasida, Aqaba koʻrfazida joylashgan. U yerda daraxtlar qalin boʻlib, shoxlari bir-biriga kirishib oʻsadi. Shunga koʻra, «ayka» nomi bilan ham ataladi. Oʻsha yerning qavmiga Alloh taolo Shuayb alayhissalomni Paygʻambar etib yubordi. Bu kishi Muso alayhissalomdan oldin kelgan Paygʻambar edilar. Shuayb alayhissalom qissasini boshqa oʻrinlarda, jumladan, «Hijr» surasi tafsirida ham oʻrganganmiz.

«Qalin daraxtzor egalari Paygʻambarlarni yolgʻonchi qildilar.»

Alloh yuborgan Paygʻambari Shuayb alayhissalomni yolgʻonchiga chiqargan Ayka xalqini hamma Paygʻambarlarni yolgʻonchi qilganlikda ayblamoqda. Chunki, avval ham bir necha bor taʼkidlanganidek, Allohning birgina Paygʻambarini rad etish barcha Paygʻambarlarni inkor qilishga barobardir.