وَلِيَعْلَمَ ٱلَّذِينَ نَافَقُوا۟ ۚ وَقِيلَ لَهُمْ تَعَالَوْا۟ قَـٰتِلُوا۟ فِى سَبِيلِ ٱللَّهِ أَوِ ٱدْفَعُوا۟ ۖ قَالُوا۟ لَوْ نَعْلَمُ قِتَالًا لَّٱتَّبَعْنَـٰكُمْ ۗ هُمْ لِلْكُفْرِ يَوْمَئِذٍ أَقْرَبُ مِنْهُمْ لِلْإِيمَـٰنِ ۚ يَقُولُونَ بِأَفْوَٰهِهِم مَّا لَيْسَ فِى قُلُوبِهِمْ ۗ وَٱللَّهُ أَعْلَمُ بِمَا يَكْتُمُونَ
Muhammad Sodiq Muhammad Yusuf: Va munofiqlik qilayotganlarni bilish uchun yetdi. Va ularga: «Kelinglar, Allohning yo`lida urush qilinglar yoki mudofaa qilinglar», deyildi. Ular: «Agar jang bo`lishini aniq bilsak, sizga ergashardik», – dedilar. Ular o`sha kunda iymondan ko`ra kufrga yaqinroq edilar. Tillari bilan dillarida yo`q narsani ayturlar. Alloh berkitayotgan narsalarini yaxshi biluvchi Zotdir.Ва мунофиқлик қилаётганларни билиш учун етди. Ва уларга: «Келинглар, Аллоҳнинг йўлида уруш қилинглар ёки мудофаа қилинглар», дейилди. Улар: «Агар жанг бўлишини аниқ билсак, сизга эргашардик», – дедилар. Улар ўша кунда иймондан кўра куфрга яқинроқ эдилар. Тиллари билан дилларида йўқ нарсани айтурлар. Аллоҳ беркитаётган нарсаларини яхши билувчи Зотдир.Alauddin Mansour: Hamda nifoq yoʻliga kirgan kimsalarni aniqlash uchun boʻldi. Ularga: «Kelinglar, Alloh yoʻlida jang qilinglar yoki (hech boʻlmasa bizning sanogʻimizni koʻpaytirish bilan dushmanni) daf qilinglar», deyilsa, «Agar jang boʻlishini aniq bilganimizda-ku sizlarning ortingizdan borgan boʻlar edik», deyishadi. Oʻsha kuni ular iymondan koʻra kufrga yaqinroq edilar. Ular ogʻizda koʻngillarida boʻlmagan narsalarni gapirmoqdalar. Alloh esa ularning yashirgan sirlarini juda yaxshi bilguvchidir.Ҳамда нифоқ йўлига кирган кимсаларни аниқлаш учун бўлди. Уларга: «Келинглар, Аллоҳ йўлида жанг қилинглар ёки (ҳеч бўлмаса бизнинг саноғимизни кўпайтириш билан душманни) даф қилинглар», дейилса, «Агар жанг бўлишини аниқ билганимизда-ку сизларнинг ортингиздан борган бўлар эдик», дейишади. Ўша куни улар иймондан кўра куфрга яқинроқ эдилар. Улар оғизда кўнгилларида бўлмаган нарсаларни гапирмоқдалар. Аллоҳ эса уларнинг яширган сирларини жуда яхши билгувчидир.
Allohning iznisiz hech narsa boʻlmaydi. Shuningdek, Uhud urushi kuni musulmonlarga yetgan musiybat ham Allohning izni bilan boʻlgan.
«Ikki jamoa toʻqnashgan kuni sizga musiybat Allohning izni bilan» yetdi.
Musulmonlar gʻalabaga olib boruvchi shartlarni buzishgan edi, Alloh ularga musiybat yetishini iroda qildi. Shu bilan birga, yetgan u musiybatlar behikmat emasdi. Jumladan, musulmonlarga Uhud jangida musiybat yetishining hikmatlaridan biri:
«Moʻminlarni bilish uchun»dir. Yaʼni, kim haqiqiy moʻmin ekanligi shunday ogʻir holatlarda bilinadi.
Shuningdek,
«munofiqlik qilayotganlarni bilish uchun»dir.
Darhaqiqat, Uhud urushi kuni munofiqlar ochiq-oydin bilinib qoldilar. Nifoqning boshi boʻlmish Abdulloh ibn Ubay ibn Salul askarning uchdan birini yoʻldan qaytarib olib ketdi.
«Ularga: «Kelinglar, Allohning yoʻlida urush qilinglar yoki mudofaa qilinglar», deyildi.»
Yaʼni, munofiqlarga: «Sizlar ham musulmonman deyapsizlar, mana, dushman bostirib keldi. Har bir musulmonga jihod farz boʻldi. Kelinglar, sizlar ham Allohning yoʻlida urush qilinglar. Agar Allohning yoʻlida urush qilishni xohlamasalaringiz, hech boʻlmasa, oʻzlaringizni mudofaa qilinglar», deyildi. Ammo, ularning munofiqliklari oshkora boʻldi:
«Ular: «Agar jang boʻlishini aniq bilsak, sizga ergashardik»,– dedilar».
Munofiqlar shu yerda ham munofiqliklarini namoyon etdilar. Oʻzlari ichlarida urushdan qoʻrqib qochayotgan boʻlsalar ham, buni oshkora qilmay, «Bizning safga qoʻshilmasligimiz urushdan qoʻrqayotganimizdan emas, balki jang boʻlmaydi, deb oʻylayotganimizdandir. Agar jang boʻlishini aniq bilganimizda, sizlar bilan birga jang qilar edik»,–deyishdi.
«Ular oʻsha kunda iymondan koʻra kufrga yaqinroq edilar.»
Munofiqlar goh iymonga, goh kufrga yaqinlashib turadilar. Tarozining pallasi iymon tarafga bosib qolsa, iymonga yaqinlashadilar. Kufr tarafga ogʻsa, ular ham kufrga yaqinlashadilar. Voqea boʻlib oʻtgan kuni munofiqlar oʻzlarining ushbu tutgan mavqiflari bilan iymondan koʻra kufrga yaqinliklarini isbot qildilar.
«Tillari bilan dillarida yoʻq narsani ayturlar.»
Ular oʻzlaricha: shunday qilib ishimizni bitirib yuraveramiz, dilimizdagini kim bilib oʻtiribdi, deb oʻylaydilar.
Aslida esa:
«Alloh berkitayotgan narsalarini yaxshi biluvchi Zotdir».
Ularning nifoqini–tillari soʻzlayotgan narsa aslida dillarida yoʻq ekanini yaxshi biladi.
Soʻngra, munofiqlarning kirdikorlarini fosh qilishda yana davom etiladi: