Oyatda, bayon qilib berishni xohlaydi, deyilganda, nimani bayon qilib berish ekanligi qayd etilmagan. Bu Qurʼoniy uslub katta maʼnolarni oʻz ichiga oladi. Oʻquvchi oʻzi avvalgi oyatlarning maʼnolaridan chiqarib olaveradi. Demak, Alloh taoloning xohlagani bandalariga bayon qilishdir, ulardan yashirish yo tushunmaydigan qilish va topishmoqqa aylantirish emas. Alloh taoloning musulmonlarni Oʻz bayoniga munosib kishilar deb topishi, ularga bayonni yuborishi ham ulkan eʼtibordir.

«Sizni oldingilarning yoʻliga hidoyat qilishni...» xohlaydi.

Musulmonlardan oldingi oʻtgan qavmlar ham musulmon boʻlganlar. Ularning yoʻlini ham Allohning Oʻzi koʻrsatib bergan. Shuning uchun ham, bu yoʻlning asli mustahkam. Barcha iymonlilar bosib oʻtgan va bosib oʻtajak yoʻl. Alloh taolo oʻta ishonchli va ilohiy yoʻlni oxirgi ummatga–Muhammad alayhissalomning ummatlariga bayon qilib, ularni oʻsha yoʻlga hidoyat etishni xohlaydi.

«Va tavbalaringizni qabul etishni xohlaydir».

Demak, Alloh taoloning hamma narsani bayon qilib berishdan, oʻtgan azizlarning yoʻliga hidoyat qilishdan maqsadi–adashganlar tavba qilishi va ularning tavbasini qabul etib, rahim koʻrsatib, yoʻlni osonlashtirishdir.

«Alloh biluvchi va hikmatli Zotdir».

U zot hamma narsani biluvchi boʻlganidan ham uning bayonlari va koʻrsatgan yoʻllari ilmiydir. Har bir narsani avvalidan oxirigacha yaxshi bilib, oqibatini ham yaxshi bilib turib koʻrsatmalar beradi. Bu ilm cheksiz va azaliydir.

Alloh taolo hikmatli Zot boʻlganidan koʻrsatmalarining hammasi hikmatga asoslangandir.

Ha,