Shuning uchun kufr keltiradilar, qayta tirilishni inkor etadilar. Holbuki, oʻlgandan keyin qayta tirilish mantiq taqozosidir, aql taqozosidir. Chunki, bu dunyo inson hayotining maʼlum bir bosqichi, xolos. Bu dunyo oxiratning ekinzori, xolos. Oxirat hayotiga har bir banda qancha va qanday hosil bilan borishini aniqlab olish bekati, xolos. Jannatga kim kiradiyu doʻzaxga kim kirishi ajratib olinadigan joy, xolos. Bandalarga bu dunyodagi amallarining mukofoti yoki jazosi berilmasa, yaxshi bilan yomonning farqi qolmaydi. Adolat boʻlmaydi. Ilohiy adolat yuzaga chiqishi uchun, har kim oʻz qilmishiga yarasha mukofot yoki jazo olishi uchun qayta tirilish boʻlmogʻi zarur. Mushriklar, oʻzlaricha, oʻlganimizdan keyin qayta tirilmaymiz, deb ovora boʻladilar.