Oyati karimada «birodar» deb tarjima qilingan soʻzimiz arab tilida birlikda «axun» kalimasi bilan ifoda qilinib, ikki xil maʼnoda ishlatiladi.

Birinchisi–aka yoki uka, yaʼni,tugʻishgan birodar maʼnosida.

Ikkinchisi–doʻst, ogʻayni, yaʼni, tutingan birodar maʼnosida ham ishlatiladi.

Ammo xuddi shu soʻzning oʻzi jam siygʻasida kelganda, maʼnosiga qarab ikki xil shaklda keladi:

Birinchisi, «ixvatun» boʻlib, tugʻishgan birodarlar maʼnosini anglatadi.

Ikkinchisi, «ixvonun» boʻlib, doʻstlashgan birodarlar maʼnosini anglatadi.

Qurʼoni Karimning moʻʼjizaligini qarangki, moʻminlarning birodarligi haqida soʻz ketganda tugʻishgan birodarlar maʼnosidagi «ixvatun» soʻzi ishlatilgan va bu bilan moʻminlar xuddi tugʻishgan aka-ukalardek ekanligi taʼkidlangan.

«Albatta, moʻminlar birodardirlar.»

Darhaqiqat, bu birodarlik din qardoshligi boʻlib, dunyodagi barcha insoniy aloqalardan ustun turadi. Bu birodarlik Alloh uchun, dinu diyonat uchun, Islom-iymon uchundir va u oʻzaro muhabbat, tinchlik-omonlik va hamkorlik asosiga qurilgan boʻladi. Bu birodarlikka futur yetsa, zudlik bilan isloh qilishga oʻtmoq kerak. Shuning uchun ham, oyatda Alloh:

«bas, ikki birodaringiz oʻrtasini isloh qiling», deb taʼkidlamoqda.

Albatta, urushganlarning oʻrtasini sulh qilish oson emas, turli holatlar kelib chiqishi mumkin. Shuning uchun ham, isloh qilmoqchi boʻlgan taraf oʻziga Allohning taqvosini qurol qilib olishi zarur. Faqat shundagina adolat bilan ish tutishga muyassar boʻladi. Oyatning oxiridagi amr shuning uchun keltirilgan:

«Va Allohga taqvo qiling, shoyadki, rahim qilinsangiz».

Keyingi keladigan oyatlarda mazkur qimmatli va zaruriy birodarlikni buzuvchi baʼzi ijtimoiy kasallik boʻlmish yomon odatlardan moʻminlarni qaytarish uchun koʻrsatmalar keladi.