«Birodaringiz» deb Muhammad alayhissalom nazarda tutiladilar. Oʻsha vaqtdagi kishilarga nima uchun «birodaringiz» deyilyapti? Yaʼni, ichingizdan chiqqan, hayotini yaxshi bilasizlar, uning sizlardan yashirin joyi yoʻq, umri boʻyi ichingizda yurdi. Uning fazilatlariga, yaxshiliklariga tajribada guvoh boʻlgansizlar, undan yomonlik koʻrmagansizlar, yolgʻon gapirganini ham bilmaysizlar, deyilmoqchi.

«Adashgan» soʻzi (arabchasi «Zolla») bilmasdan notoʻgʻri ishlarni qilib qoʻygan kimsalarga nisbatan ishlatiladi. Bolaligidan rostgoʻyligi, omonatga xiyonat qilmasligi, adolatliligi va boshqa jamiyki yaxshi fazilatlari ila mashhur boʻlgan inson qirq yoshga yetganda birdaniga adashib qolishi mumkinmi? Xuddi shuningdek, bunday kimsaning dabdurustdan «yoʻldan ozgan» boʻlib qolishiga ham aql ishonmaydi. Chunki, «yoʻldan ozish» («gʻova») degani, toʻgʻri yoʻlni bilib turib notoʻgʻrisini tanlashni anglatadi. Axir, aql-zakovatda benazir Muhammad alayhissalomga jahonda shunday sifat toʻgʻri keladimi? Aslo!