Oyatdagi «Allohning nuri»dan murod Islom dinidir. Islom dinini yoʻq qilish uchun urinuvchilarning harakati quyoshning shuʼlasini ogʻiz bilan puflab oʻchirishga harakat qilishga oʻxshaydi. Undaylar qanchalik urinmasin, quyoshni soʻndira olmaganlaridek, Islom nurini ham oʻchira olmaydi.

Paygʻambarimiz alayhissalomga Qurʼoni Karimning birinchi oyati tushgan zamondan to hozirgacha Alloh taoloning dushmanlari Islomga, musulmonlarga qarshi qanchadan-qancha ishlar olib bordilar. Turli usullar va uslublar bilan dinimizga qarshi urushni bir daqiqa ham toʻxtatganlari yoʻq. Bu mashʼum urushni Makka mushriklari boshlagan boʻlsa, soʻng yahudiylar, munofiqlar davom ettirdilar. Keyinroq oʻsha zamonning ikki ulkan imperatorligi–rum va fors qarshi chiqdi. Qarshilar koʻpayib, dunyoning har tarafidan bosh koʻtara boshladilar. Salbchilar, sahyuniylar (sionistlar) musulmonlarga qarshi barcha vahshiyliklarni qildilar va qilmoqdalar. Shunday davr boʻldiki, aziz Islomiy vatanning barcha tuprogʻi mustamlakachilar oyogʻi ostida toptaldi. Lekin oyatda kelganidek:

«Alloh, kofirlar yoqtirmasa ham, oʻz nurini tugal etguvchidir».

Mana, Islom dushmanlarining hammasi oʻtdi, hammasi rasvoi raddi balo boʻldi, ikki dunyosi kuydi va tarixda nomlari yomonlik bilan zikr etiladigan boʻlib qoldi. Lekin Islom yuksakligicha, ulugʻvorligicha qolmoqda, Allohga shukr.

Ushbu oyati karimada siz bilan biz musulmonlarga ulugʻ bashorat bordir. Bu masalada ikki irodaning toʻqnashuvi koʻzga koʻrinmoqda.

Biri–Islom dushmanlarining irodasi.

Ikkinchisi–Alloh taoloning irodasi. Albatta, Allohning irodasi gʻolibligi hammaga maʼlum. Islom istiqbol dinidir.

Buni tushunish uchun kelasi oyatga eʼtibor beraylik. Islom hali kuchsiz, musulmonlar hali juda oz va turli dushmanlar atrofdan oʻrab turgan paytda tushgan bu oyatda Islomning kelgusida butun dinlardan ustun boʻlib, dunyoga tarqalishidan bashorat berilmoqda.