وَإِلَىٰ ثَمُودَ أَخَاهُمْ صَـٰلِحًا ۗ قَالَ يَـٰقَوْمِ ٱعْبُدُوا۟ ٱللَّهَ مَا لَكُم مِّنْ إِلَـٰهٍ غَيْرُهُۥ ۖ قَدْ جَآءَتْكُم بَيِّنَةٌ مِّن رَّبِّكُمْ ۖ هَـٰذِهِۦ نَاقَةُ ٱللَّهِ لَكُمْ ءَايَةً ۖ فَذَرُوهَا تَأْكُلْ فِىٓ أَرْضِ ٱللَّهِ ۖ وَلَا تَمَسُّوهَا بِسُوٓءٍ فَيَأْخُذَكُمْ عَذَابٌ أَلِيمٌ
Muhammad Sodiq Muhammad Yusuf: Va Samudga o`z birodari Solihni (yubordik). U: «Ey qavmim, Allohga ibodat qilinglar. Sizlarga Undan o`zga iloh yo`q. Sizga Robbingizdan hujjat keldi. Allohning mana bu tuyasi sizlarga belgidir. Uni Allohning yerida tek qo`yinglar. Unga yomonlik yetkazmanglar. Yana sizni alamli azob tutmasin-a!Ва Самудга ўз биродари Солиҳни (юбордик). У: «Эй қавмим, Аллоҳга ибодат қилинглар. Сизларга Ундан ўзга илоҳ йўқ. Сизга Роббингиздан ҳужжат келди. Аллоҳнинг мана бу туяси сизларга белгидир. Уни Аллоҳнинг ерида тек қўйинглар. Унга ёмонлик етказманглар. Яна сизни аламли азоб тутмасин-а!Alauddin Mansour: Samud qavmiga oʻz birodarlari Solihni (paygʻambar qildik). U aytdi: «Ey qavmim, Allohga ibodat qilingiz! Sizlar uchun Undan oʻzga biron iloh yoʻqdir. Sizlarga Parvardigoringiz tomonidan hujjat — mana bu Alloh (yuborgan) tuya sizlar uchun oyat — moʻʼjiza boʻlib keldi. Bas, uni Allohning yerida yeb-ichib yurgan holida qoʻyib yuboringlar va unga biron yomonlik yetkazmanglarki, u holda sizlarni alamli azob ushlaydi (azobga yoʻliqasizlar)».Самуд қавмига ўз биродарлари Солиҳни (пайғамбар қилдик). У айтди: «Эй қавмим, Аллоҳга ибодат қилингиз! Сизлар учун Ундан ўзга бирон илоҳ йўқдир. Сизларга Парвардигорингиз томонидан ҳужжат — мана бу Аллоҳ (юборган) туя сизлар учун оят — мўъжиза бўлиб келди. Бас, уни Аллоҳнинг ерида еб-ичиб юрган ҳолида қўйиб юборинглар ва унга бирон ёмонлик етказмангларки, у ҳолда сизларни аламли азоб ушлайди (азобга йўлиқасизлар)».
Allohning Paygʻambari Solih alayhissalom ham oʻzlaridan oldin oʻtgan Paygʻambarlarning:
«Ey qavmim, Allohga ibodat qilinglar. Sizlarga undan oʻzga iloh yoʻq», degan asosiy gʻoyalarini takror taʼkid etdilar. Avvalgi ummatlar qismati eʼtiborga olingan boʻlsa kerak, Solih alayhissalom bu daʼvatlariga nisbatan qavmlaridan javob kutib turmay:
«Sizga Robbingizdan hujjat keldi», deb bir yoʻla ilohiy hujjat haqida soʻz ochib, oʻzlarining haq Paygʻambar ekanliklarini tasdiqlovchi moʻʼjiza haqida:
«Allohning mana bu tuyasi sizlarga belgidir»,–dedilar.
Boshqa suralarda bayon qilinishicha, Samud qavmi Solih alayhissalomdan Allohning qudratiga dalolat qiluvchi va u kishining haqiqiy Paygʻambar ekanliklarini tasdiqlovchi moʻʼjiza keltirishni talab qilganlarida, Alloh taolo katta xarsang toshdan bir tuyani chiqargan. Shuning uchun ham u «Allohning tuyasi» deb atalmoqda. Solih alayhissalom oʻz soʻzlarida davom etib:
«Uni Allohning yerida tek qoʻyinglar, unga yomonlik yetkazmanglar. Yana sizni alamli azob tutmasin-a!»–dedilar.
Samud qavmidan baʼzi shaxslar bu moʻʼjizaviy tuyani koʻrib iymon keltirdilar. Tuya yaylovda oʻtlab yuraverdi. Suvdan istifoda qilish esa, navbatli boʻldi. Chunonchi, suvni bir kun tuya, bir kun Samud qavmi isteʼmol etar edilar.
Shuningdek, Allohning Paygʻambari Solih alayhissalom oʻz qavmlariga Parvardigorning neʼmatlarini ham eslatdilar:
«Va sizlarni Oddan keyin xalifa qilganini va sizga yer yuzida imkon berib, tekisliklarida qasrlar qurib, togʻlardan uylar oʻyganlaringizni eslang»,–dedilar.
Rivoyatlarda bayon etilishicha, Alloh taolo gunoh amallar qilgani uchun Od qavmini halokatga giriftor etganidan soʻng, ularning diyorida Samud nomli qavm istiqomat etib, oʻsha yerlarni obod qilganlar. Ularning umrlari bardavom boʻlib, farovon turmush kechirganlar. Past tekislik joylarni tanlab, ulkan qasrlar bunyod etganlar. Togʻlar bagʻrida toshlarni oʻyib uylar yasaganlar. Hozirgacha oʻsha maskanlarning baʼzilari saqlanib qolgan. Solih alayhissalom ularga bu narsalarning hammasi Allohning neʼmati ekanini eslatib, ularni shukr qilishga undadilar. Noshukr boʻlib, buzgʻunchilik qilmaslikka daʼvat etib:
«Allohning neʼmatlarini eslang va yer yuzida fasod-la buzgʻunchilik qilmang!»–dedilar.
Hoʻsh, qavm ne yoʻl tutdi?