Yaʼni, ey Muhammad, Oʻzim yaratgan anovi badbaxtni Oʻzimga qoʻyib qoʻy, Men uni onasining qornida molu dunyosiz, bola-chaqasiz, kuchu quvvatsiz yolgʻiz oʻzini yaratdim.

Mufassirlarimizning aniqlashlaricha, ushbu oyatda koʻzda tutilayotgan nobakorlar namoyandasi Valid ibn Mugʻiyra Quraysh kattakonlaridan boʻlib «yakka» va «Quraysh rayhoni» laqabi olgan edi. Alloh taolo unga koʻplab molu dunyo va farzandlar ato qilgan edi. Alloh taolo uning rizqini keng qilganidan, molu dunyosi daryodek oqib kelar edi. Uning Toifda bir bogʻi boʻlib, mevasi qishin-yozin uzilmas edi. Valid ibn Mugʻiyra Allohning neʼmatlariga shukr qilmadi, kufr keltirdi. Oxiri kelib, ushbu sura tafsiri muqaddimasida aytib oʻtilgan gaplar yuzaga keldi.

Ushbu oyatda va undan keyin keladigan oyatlarda oʻsha nobakor Valid ibn Mugʻiyra misolida unga oʻxshash barcha noshukr kofirlar haqida soʻz yuritiladi.