Osmonning yorilishi juda ham ulkan va dahshatli bir hodisadir. Olam bino boʻlganidan beri mustahkamlik va ulugʻvorlik ramzi boʻlib turgan osmon uncha-munchaga yorilmaydi. U, dunyoning eng ulkan va eng dahshatli hodisasi uchungina, qiyomat qoim boʻlishi uchungina yoriladi. Osmonning ana shu yorilishida maloikalar qiyomat haqidagi Alloh taoloning amrini olib tushadilar. Bu haqda boshqa surada taʼkidlab aytilgan.