Yulduzlar ham Alloh taolo ularni yaratganidan beri oʻz joylarida, oʻz burjlarida bardavom turibdilar. Qilchalik jilmayaptilar va birov ularni jildirish imkoniga ham ega emas. Ammo, yulduzlarni xalq qilgan Zot iroda qilgan vaqt kelganda shunchalik ulkan jismli, shunchalar mustahkam turgan, shunchalik bardavom yulduzlar tutday sochilib ketadilar. Albatta, bundoq boʻlishi oddiy sababdan boʻlmaydi. Balki, misli va oʻxshashi yoʻq, eng buyuk va eng dahshatli bir sabab tufayli boʻlishi turgan gap.