Bu ham Xudoning diniga qarshi chiqqan, Allohning yoʻlidagi daʼvatchilarni oʻziga dushman bilgan tugʻyonkorlarning doimiy gaplaridan biri. Atrofidagi gumashtalariga va sodda xalqqa daʼvatchini xavfli qilib koʻrsatadi hamda ularni undan qoʻrqitadi. U sizlarni yerlaringizdan haydab chiqarib, mansab, imtiyoz va imkoniyatlaringizni tortib olmoqchi, deb ularning koʻngliga vahima soladi. Gohida, ushbu oyati karimada kelganidek, qoʻrqita turib:

«Nima deysizlar?» deb atrofidagilarni oʻylantirib ham qoʻyadi. Zotan, tugʻyonkor ularning oʻziga yordamchi boʻlishlarini yaxshi biladi. Ular, agar maslahat bersalar ham, togʻutning xohishidan boshqa gapni aytishmaydi.

Ammo Firʼavn:

«Nima deysizlar?» deyish bilan gumashtalarini oʻz sadoqatlarini koʻrsatishga undashni koʻzlagan edi.

Bu safar ham shunday boʻldi. Firʼavn Muso alayhissalomni sehrgar deganini gumashtalar ilib oldilar va «xoʻjayin»ning oʻtkir sehrgarlari borligini bilganlaridan, shoyad, Muso magʻlub boʻlsa, deb sehr musobaqasi oʻtkazishni taklif qildilar.