قُلْ كَفَىٰ بِٱللَّهِ بَيْنِى وَبَيْنَكُمْ شَهِيدًا ۖ يَعْلَمُ مَا فِى ٱلسَّمَـٰوَٰتِ وَٱلْأَرْضِ ۗ وَٱلَّذِينَ ءَامَنُوا۟ بِٱلْبَـٰطِلِ وَكَفَرُوا۟ بِٱللَّهِ أُو۟لَـٰٓئِكَ هُمُ ٱلْخَـٰسِرُونَ
Muhammad Sodiq Muhammad Yusuf: Sen: «Men bilan sizning oramizda guvohlikka Allohning O`zi kifoyadir. U osmonlaru yerdagi narsani bilur. Botilga iymon keltirib, Allohga kufr keltirganlar, ana o`shalar o`zlari ziyon ko`rguvchilardir», deb ayt.Сен: «Мен билан сизнинг орамизда гувоҳликка Аллоҳнинг Ўзи кифоядир. У осмонлару ердаги нарсани билур. Ботилга иймон келтириб, Аллоҳга куфр келтирганлар, ана ўшалар ўзлари зиён кўргувчилардир», деб айт.Alauddin Mansour: Ayting: «Alloh men bilan sizlarning oʻrtangizda yetarli guvohdir. U zot osmonlar va Yerdagi bor narsani bilur. Botil narsaga (yaʼni, butlarga) iymon keltirib, Allohga kofir boʻlgan kimsalar — ana oʻshalar ziyon koʻrguvchilarning oʻzidirlar».Айтинг: «Аллоҳ мен билан сизларнинг ўртангизда етарли гувоҳдир. У зот осмонлар ва Ердаги бор нарсани билур. Ботил нарсага (яъни, бутларга) иймон келтириб, Аллоҳга кофир бўлган кимсалар — ана ўшалар зиён кўргувчиларнинг ўзидирлар».
Ey Muhammad, kofirlar bilan tortishib oʻtirma, ularga inkor qilib boʻlmaydigan guvoh keltir. Ular bilan oralaringizda meni guvoh qil. Ularga:
«Men bilan sizning oramizda guvohlikka Allohning Oʻzi kifoyadir», deb ayt.
Kimning qanaqa ekaniga Allohning Oʻzi guvohlik beradi. Mening U zot tomonidan Paygʻambar etib yuborilganimga ham, menga Qurʼon nozil etilganiga ham Allohning Oʻzi guvohlik beradi. Sizning kofir–ahli botil ekaningizga ham Allohning Oʻzi guvohlik beradi. Chunki:
«U osmonlaru yerdagi narsani bilur».
Osmonlaru yerda U bilmaydigan narsa yoʻq. Shu jumladan, mening kimligimni ham, sizning kimligingizni ham yaxshi biladi. Ey kofirlar, bilib qoʻyingki:
«Botilga iymon keltirib, Allohga kufr keltirganlar, ana oʻshalar oʻzlari ziyon koʻrguvchilardir».
Boshqalar emas. Ular har taraflama ziyon koʻradilar. Avvalo, bu dunyoda ziyon koʻradilar. Qolaversa, u dunyoda ham ziyon koʻradilar. Shuningdek, hammaga ham maʼlum va mashhurdirki, botilga ergashib, Allohga kufr keltirish hech qachon, hech kimga zarracha foyda keltirmagan.