Yuqorida aytganimizdek, bu oyatlarda tuya bilan Samud qavmi oʻrtasida suvning kunma-kun taqsimlangani toʻgʻrisida gap borayotibdi. Alloh taolo Oʻz Paygʻambari Solih alayhissalomga xitob qilib, quyidagilarni aytmoqda: «Biz ularni sinash uchun tuyani yuboruvchimiz». Biz Samud qavmiga moʻʼjiza qilib tuyani yuboramiz. Bu, ular uchun oʻziga xos sinov boʻladi. Sen esa, ey Solih, «Ularni kuzatib tur va sabr qil». Keyin oqibat nima bilan tamom boʻlishini koʻrasan. «Va ularga, albatta, suv oralarida taqsimlanganining xabarini ber.» Ey Solih, sen Samud qavmiga suv ular bilan tuya orasida taqsimlanganini, bir kun ular, bir kun tuya suv ichishi kerakligini ayt. «Har bir ichishga (oʻz vaqtida) hozir boʻlinar.» Har tomon oʻzining suv ichish navbati kelgandagina chashmaga suv ichgani hozir boʻladi. Shu bilan Solih alayhissalomga qilinayotgan xitob tugab, yana qissa voqealari hikoyasi davom etadi.