Ha, Alloh taolo insonni oʻldirib, qabrga kiritib, tek qoʻyib qoʻymaydi. Balki, qachon xohlasa, uni qayta tiriltiradi. Qayta tiriltirish esa, bu dunyoda qilganlarini hisob-kitob qilib, jazo yoki mukofotini berish uchun boʻladi. Shuning uchun, inson bu dunyoda Alloh taologa iymon keltirib, toat qilishi, Paygʻambar sollallohu alayhi vasallamga iymon keltirib, u zotga ergashishi, Qurʼonga iymon keltirib, amal qilishi lozim. Ammo inson oʻzini boshqacha tutmoqda. Inson oʻzini bundoq notoʻgʻri tutmasligi kerak edi!