Din dushmanlari doimo yolgʻon, boʻhton tarqatib dinga va uning ahliga zarar yetkazmoqchi boʻlishadi. Makka kofirlari ham Muhammad sollallohu alayhi vasallam haqlarida «majnun», jin urgan, aytayotgan gaplarini katta bir jin kelib oʻrgatib ketadi, buning gapiga ishonmaslik kerak, degan igʻvolarni tarqatishgan. Bu oyatlar oʻsha tuhmatboʻhtonlarga raddiyadir. Ey makkaliklar, Muhammad «sohibingiz», yaʼni suhbatingizda siz bilan doʻst boʻlib yurgan odam, buni sizlar yaxshi bilasizlar–jinni emas. Unga vahiy keltirayotgan ham jin emas, balki ulkan farishta, ishonchli zot. Qurʼon esa, ilohiy dastur.