Alloh taoloning insonni toʻla-toʻkis qilib yaratishi–uni nuqsonsiz qilib, oʻziga kerak boʻlgan hamma aʼzolar bilan taʼminlab yaratishidir. Darhaqiqat, insonning tuzilishiga, uning aʼzolariga diqqat bilan nazar solgan har bir shaxs bu maʼnoni darhol fahmlab yetadi. Bu masalani yaxshilab oʻrgangan mutaxassislar esa, inson vujudida inson aqli bovar qilmaydigan toʻla-toʻkislik borligini tushunib yetib, Alloh taologa iymon keltiradilar. Insonning qon aylanish tizimi, koʻrishi, hid bilishi, fikrlashi, asabi, xotirasi va boshqa tomonlarini oʻrganganlar esa, mazkur narsalardagi toʻlatoʻkislik va mutanosiblikni koʻrib hayratga tushadilar. Shuning uchun ham, insonni oʻrganish boʻyicha AQSHdagi katta ilmiy markazga qirq yildan ortiq rahbarlik qilgan, dunyoning eng katta ilmiy mukofotlarini olgan kishi ham «Inson, ana oʻsha majhul» nomli kitob yozdi.

Insonning Alloh taolo tomonidan moʻʼtadil qomat va aʼzolar ila yaratilganligi haqida gapirishning oʻzi umuman ortiqcha ish.

Xoʻsh, Alloh taolo insonni shundoq qilib yaratib qoʻyibdi. Alloh tomonidan toʻla-toʻkis va moʻʼtadil etib yaratilgan oʻsha inson hech boʻlmasa, oʻzining toʻla-toʻkisligidan foydalanganda Xoliqiga shukr qilsa boʻlmaydimi?! Oʻsha inson, hech boʻlmasa, oʻzining moʻʼtadilligidan manfaat topganda oʻz Xoliqiga shukr qilsa boʻlmaydimi?! Alloh taolo haqida gʻururga ketishni unga kim qoʻyibdi?!