Bu degani, mazkur badbaxt azobda bardavom boʻladi, deganidir. Chunki, oʻlsa, azobdan qutulib ketadi. Haqiqiy tirik boʻlsa ham, hayotdan manfaatdor boʻlishi kerak.

Demak, bu dunyoda vaʼz-nasihat va eslatmadan chetda boʻlgan badbaxt u dunyoda oxiratning katta oloviga kiradi va oʻsha olov ichida oʻlib-oʻlmay, tirilib-tirilmay doimiy azob-uqubat ichida qoladi. Albatta, eslatmadan chetda boʻlgani uchun, iymon, Islom, amal-ibodatdan uzoqda boʻlgani uchun shunday boʻladi. Ammo oʻsha badbaxtning holi tamoman boshqacha tarzda, eng yaxshi holatlarda boʻlishi ham mumkin edi. Buning uchun esa, vaʼz-nasihat va eslatmadan chetda boʻlmasligi va quyidagi oyatlarda zikr qilinadigan ishlarni qilishi kerak edi.