Koʻradilar nima boʻlishini. Yaʼni, ey Muhammad, qiyomat kuni Robbing bandalar orasida ajrim hukmini chiqarish uchun kelganda va farishtalar saf-saf boʻlib Robbingning kofirlarni azoblash uchun chiqargan amrini ijro etish uchun kelganlarida, dinni inkor qilib, oʻzini katta tutayotgan oʻsha boy-badavlatlar Alloh taoloning sinovidan oʻta olmaganlarini anglab qoladilar.

«At-Tashiyl li ulumil tanziyl» kitobida ushbu oyat tafsirida al-Munzir ibn Saʼiydan quyidagilar keltiriladi: «Buning maʼnosi, oʻsha yerda xaloyiqqa U zotning zohir boʻlishi. Ushbu va shunga oʻxshash oyatlarga hech qanday kayfiyatsiz va oʻxshatishsiz iymon keltirish vojib».

Xuddi ana shu ehtiyot maʼnosida bir qism mufassirlarimiz «Robbing va farishtalar saf-saf boʻlib kelsalar» oyatini «Robbingning amri kelsa», deb taʼviyl qilganlar.

Kelgusi oyatda insonni kelajakda kutayotgan ogʻir sinov va hodisalar haqidagi gaplar davom etadi.